Heng social media te hi kum 8-15 a upa chauh an ni a, kum 5 an tlinin hmangtu hi maktaduai za tel tak meuh nei hman thiau an ni hlawm a, a nghawng pawh a na bawk a, kan inring hman lo ti ila kan sawi sual tampui lo ang. Khawvela micheng 50% deuh thawin social media hi kan hmang mek a ni.

A awmziaah chuan print media leh broadcasting media te chu an rei tawh bakah mimir thleng tura larchhuak turin kum tak tak a ngai a, a chhiartute/thlirtute leh media chu inhnerem zawkin an thang kawp a tih theih ang. Chu’ng ang chu social media ah chuan a la awm ve hman ta lo a, a ri pawpa ‘social media boom’ a intan a ni der a.

A nihna takah chuan social media hi professional ho hmanrua ni tlak a ni a, vantlang kutah an hlui ta rawih si a, news writer, journalist, advertiser, promoter kan ni ta vek tihna a nih chu. Mahse, a hmangtu lam kha kan ‘proffe’ ta bawk si lo a, awm dan kan thiam ta lo a ni.

Eizawn nana hmang mi tlemte journalist te kutah chauh media chu awm tura ngaih chi a ni tawh lo a, journalist-te chauh hriat leh hman tur anga ngaih - ethics te chu media kan hman vek tawh avangin tam tak kan intawm tawh tih hriattur a ni a. Media ethics tlangpui hi social media hmangtute’n kan hriat ve a ngai tawh hle mai a, a nih loh chuan pawi kan khawih fo dawn tihna a ni. Mawhphurhna a sang hle! Hei tak hi a laimu lai chu a ni a, media ethics hi a tlangpui hria ila kan zia khawpin a rinawm.

Social media hi a than (evolve) chak em avang hian a hmangtu tan a hahthlak chang a awm fo a, mit khap karah kiltin atangin thu a lo luta, ‘information overload’ dik tak a ni. Mihring thluakin a hriatsen loh avangin hriatna pawh a ril hlei thei lo a nih ber hi.

Indian constitution ah hian press/media zalenna hi a hranin a inziak loa, article 19 (1) right to freedom of expression tlawhchhana ethics hi piang a ni a. Kan chanvo erawh midang tana hnawk kan nih lohna turin chi 8 a khuahkhirh Art 19 (2) a ni thung a, mi tihhming chhiat te, dan bawchhhe tura mi dang fuihpawrh te, court rorelna zahloh te, awm leh mawi ramri pelh te phalloh niin a langsar zual deuh te an ni hlawm. Heng ringawt pawh hi vawng ila tuna kan buaina hi kan pumpelh thei ang.

Thuchiang lo theh-darhtu ah i tel ve chuan hlau hle rawh, midang dan bawchhe tura fuihpawrhtu ah i tang thei der a ni. 2017 khan Karbi Anglong-ah tlangval 2 chu naupang ruk chinga puh an ni hlauh mai a, mipui 250 pungkhawmin an chilhlum a, hei pawh hi social media a thuchiang lo darh atanga intan a ni. He case hi finfiah an nih hnuin rimawi thiam, rimawi ri thar zawnga zin an ni tih hriat a ni leh si a, a pawi tur erawh a pawi zo tawh. ‘Ka lo forward ve mai mai’ pawh ti la dan anga hrem theih i ni tihna a nih chu.