Rualbanlo ten an thawh theih tawk an thawh ve theihna atana sawrkarin kum 2007 atanga 3% hna a hauhsak thin chu kum 2016 atang khan 4%-ah tihsan a ni a. Mizoram sawrkar pawhin Persons With Disabilities(PWD) te hna hauhsak hi a kalpui tha hle a, hriat theih chinah he hna hauhsakna hnuaiah hian PwD hnathawk mi 58 an awm tawh a ni.
Mizorama pianphunga rualbanlote tana thawktu leh hma latu, Persons with Disabilities Commissioner Dr.Lalnunthara chuan rualbanlo te tana 4% hna hauhsak chu Mizoram sawrkarin a hmangtha nia an hriat avangin an lawm hle tih Zalen a hrilh a. Rualbanloten kohhran ah chanvo pawimawh leh an tel vena tur tam zawk a awm theihnan tunhnai khan kohhran hrang hrang hotute chu hemi chungchang hi an sawipui tih sawiin, "Rualbanlote tan biakina inkhawmna tur kalkawng nuam zawk (ramp) te awm se kan duh a, tawng chungchangah pawh tun hnaiah tawng thei lo inneite an awm tawh avang leh an tlangnel zawkna atan an hriatthiam theih zawnga inbiakna kawngah pawh hmalak nise kan duh hle a ni,” a ti bawk.
PwD annual report 2017-18 tarlan danin, Commissioner for Persons with Disabilities hian Mizoram sawrkar hnuaia department tinte chu an department-ah pianphunga rualbanlote thawh tur post dinhmun a zawt a, hnawhkhah a nih dan te leh thil awmzia sawifiah tura tih an ni.
Department 42-in chu lehkha chu an chhang a, an chhanna atang chuan Group ‘A’, ‘B’, ‘C’ leh ‘D’-ah pianphunga rualbanlo mi 58 an thawk tih a ni.
Court of the Chief Commissioner for Persons with Disabilities, Ministry of Social Justice & Empowerment hnuaia miin order a siam bawhzuiin Commissioner for Persons with Disabilities hian Mizoram sawrkar hnuaia department tinte chu an website pianphunga rualbanlote'n an en theih tura siam turin a ngen a, department engemaw zatin hei hi an tihlawhtling tih Annual Report-ah chuan a lang.
Annual Report-a tarlan danin Mizoramah Special School pariat a awm a, hengte hi Aizawl, Lunglei, Kolasib, Kolasib leh Siah ah te a ni a, hetih lai hian Mamit, Lawngtlai leh Champhai Distrcit-ah a awm lo a ni. Special School hi Aizawl Distria awmin district dangah te hian 1 zel a awm a ni.
Mizoramah hian pianphunga rualbanlote'n lehkha an zir theih nan Inclusive Education for the Disabled Students in the State (IEDSS) kalpui a ni a, integrated Education for Disabled Children (IEDC) a awm bawk a, IEDC hi centrally Sponsored scheme a ni. Annual Report-a tarlan a nih danin, RMSA hnuaiah rualbanlo mi 2421 an awm a, SSA hnuaiah mi 3285 awmin, zirlai 33 chu an inah zirtir an ni a. RMS sikul 288 leh SSA sikul 256 te chu rualbanlo naupangte luh theihna tura sak a ni.
Kum 2011 chhiarpui atanga alan danin Mizoramah pianphunga rualbanlo 7894 an awm a, heng te hi taksa sawngnawi (Orthopaedically handicapped) 2360, rilru lama harsatna nei (Mental retardation) 1874, khaw hmuh fiah lo/mit tha lo (Visually impaired) 1436, beng thalo (Hearing impaired) 1996 leh thildang vanga rualbanlo (Multiple disability) 228 te an ni.