Tunhnaia Northeast News tih velah Mizoram in Sethawn, Kolasib ah Rehab Center changkang thei ang ber din a tum tih an rawn chhuah a. A inziah dan chuan Social Rehabilitation Board hmalakna a ni awm a, kan CM chuan he project hi ngaih pawimawh hmasak berah nei turin a ti niin an ziak. Board din a ni hi a lawmawm khawp mai a, ruihhlo bakah hian eng rehabilitation dang nge an khawih dawn tihte pawh hriat a chakawm hle mai. Engpawhnise, Sethawnah hetiang hmun buatsaih tumna a awm leh ta hi eng angin nge kan sawtpui ang tih hi ngaihtuah a tul hle mai.
Kan so

rkar hian a term hmasa lamah khan Sethawn center hi a lo kalpui tawh a. Doctor leh medical staff dangte pawh dahin hma an lo la viau thin tawh a. Mahse, he hmalakna hi a hlamzuih ta kha a ni a, kohhran mal enkawl turin an zawrh titih tih thawmte pawh a awm hial anih kha. Tun tuma tharthawh leh kan tum takah chuan hriat hmasak tul tak mai a awm ta a, a hmaa kan hmalakna kha engvanga hlamzuih ta nge a nih? Engnge kan tih dik lohna lai? Engti zawngin nge tih dan tha ni ang? Ruihhlo ngawlvei te enkawl dan turah hian khawvel hmun danga scientific evidence-based hmalakna an kalpui dan te kan zir chiang tawh em? tih zawng zawngte hriat a chakawm hle mai.

Kan ramah ruihhlo vanga buaina chuan zual lam a pan zel chu a ni a, ni tin deuhthaw mai kan inman a; mahse, a mamawh tan chuan duh zat zat lei tur a awm reng mai chu a ni e. Kan thalaite ruihhlo vanga buai an pun belh zel a, kan inenkawl seng lova, Rehab home kan neihin min zo lova, jail lam lah nise a tang tam zawk chu an sawi danin ruihhlo kaihhnawiha tang an ni a, SRS lamin an mi mante an khung khawmna ber TBCC center ber pawhin min zo lo chu a ni ber. Ruihhlo mamawhna demand ti tlem tur zawnga hmalakna demand reduction lamah hian kan la chau viau a ni thei awm e.

Social Welfare Dept lam pawh heti zawnga chak taka hma la tur hian an inbuatsaih niin a lang. Rehab Home te changtlung zawka an kal theih nan Accreditation rules (endikna hmanrua) an duan te pawh Cabinet meeting ah an lo pass tih thawm te kha chanchinbu lamah an chhuah tawh anih kha.

Ruihhlo ngawlvei te enkawl kawngah hian thlarau thawh dan ang anga kal ngawt chi a ni lo viau mai. Kan thlen chin pawh a thui thei lem lo chu a ni. Khawvelin kalphung tha an tih te entawn a, scientific evidence behchhan ngeia hmalakna kan kalpui ve hi a tul hle niin a lang. Chutiang avang chuan he Sethawn Rehab Center thuam thar leh tuma sorkar hmalakna hi ngaihtuah chian a ngai viau mai. TBCC Chawnpui leh Home danga kan inenkawl dan te hi research hmangin han zir ta ila, enge kan success rate ni ang? Kan khung khawm chhung an awm a, an lo chhuah hunah an nun ngaiah an let leh mai em? An awm chhungin nungchang tha zawk an zir chhuak nge sual dan changkang an thiam belh zawk? Jail tang zinga ruihhlo leh a kaihhnawih vanga tang te hi an tang nawn fo mai tih an sawi a, khung khawm chuan mihring a siam tha lem te pawh a ni thei ang.

Engpawhnise, kan hotute hmalakna leh thahnemngaihna hi a lawmawm a. Hlawhtlinna kan hmuh ngei theih nan mumal taka ruahmanna an siam theih a duhawm. Engtinnge he Sethawn ah hian enkawlna an kalpui ang? Tutenge enkawl ang? Hetiang hmun lian leh hautak enkawl tur hian khawia sum nge an hman ang? A ruala mi thahnem tak enkawl an tum dawn chuan a hautak hle dawn a, kalphung mumal a awm thei ang em? Cabinet in a pass tawh ngei Accreditation rules te hi zawm theih a ni ang em? Heng zawhna te hi hriat chian a chakawm hle mai. Kan ti vek vek anih chuan pamtul emaw hlamzuih leh mai mai lo tura hmalak nise a tha ngawt ang.