Mizote thei duh leh lar tak mai zinga mi chu serthlum hi a ni a. Mizoram mai ni lovin state pawnah pawh kum tin eng emaw zat thawnchhuah a ni thin. Kuminah erawh chuan serthlum thar hian kum dang a phak lo a, a rah pawh a tê zawk bawk.

Serthlum chin vanga Mizoram puma lar East Lungdar VCP chuan kum dang aiin kuminah an serthlum thar chu nasa takin a tlahniam niin Zalen a hrilh a. Kuminah hian serthlumte hi lawh/hralh zawh vek la ni chiah lo mahse nikum lam chu an phak dawn lo niin a sawi a, tuna la hralh lo te hian hralh vek pawh nise nikum lam chu an phak dawn lo nia sawiin, “Nikum lamah kha chuan serthlum hralhna atang hian kan khua ringawt pawh hian nuai 60/70 te kan lei a, kuminah erawh chuan nuai 50 vel bak kan lei chhuah a beiseiawm loh a. Chu mai bakah kum dang aiin a rah hi a tê zawk bawk a ni,” a ti. East Lungdar serthlum chu a thlum tui hle nia sawiin, “Kan khaw serthlum hi a tui avangin serthlum zuar thenkhat chuan kan khaw ta lo pawh kan khua atanga thar angtein an sawi a ni,” tiin Mizoramah E.Lungdar chu khaw mal khaiah serthlum thar tam ber an nih thu a sawi.

ZALEN-in Aizawl khawpuia serthlum zuar chhawng thin te a kawm kualna ah an serthlum zawrh chu khawchhak lam E.Lungdar, Leng leh a chhehvel khua atanga an lak a ni ber tih an sawi a. Kumin ah an duh angin serthlum kharchhawn tur an nei tam lo a, a rah pawh kum dang ai chuan a te zawk niin an sawi bakah kum danga hnam dang kharchhawng thinte pawhin kuminah chuan an duh ang khar tur an nei lo niin an sawi bawk.

ZALEN zawhna chhangin Horticulture department thawktute chuan kumin chu serthlum rah that loh kum niin an sawi bawk a. “Serthlum hi a rah that kum leh kum lo hi a awm ve a, kumin hi chu kumdang ai chuan a thar tlem zawk dawn niin kan hria,” an ti. Hnam dang sumdawng ten an phurh chhuah leh phurh chhuah loh chungchangah chuan Covid-19 hri leng avangin kum dang angin sumdawngte an lo lut lo nia sawiin, “Kum dangah chuan sumdawng mi engemaw zat hi serthlum lei tur hian an lo kal thin a. Thenkhat phei chuan a par lai atangten an hauh lawk a, kuminah erawh chuan hetiang hi a awm kan hre lo a ni,” an ti.

Mizoram serthlum chu a thlum danah pawh a tha tawk thawkhat niin an sawi a. “India ramah chuan a quality tha ber niah kan ngai a, kan chinna area azirin a thlum tui hle a ni,” an ti bawk.