One way kawng te takte ah kan zawh mek laiin hmeichhia scooty a inkhalh kan tawk a, inpelh ngaihna a awm lo. “A dik lo zawngin i rawn tlan a’ kan han ti chu, “Motor kawng a nia ka duh dan danin ka tlan ang” tia lim erh leh rum zeta melh kan hlawhchhuak hram. An sawi fo scooty khalh an nghal zia a takin ka tawng ve a, nawn a chakawm fahran lemlo khawp mai. Chhun thingpui kan inhonaah “Nula senior lam phei chu hauh enah kan en lo fo, i thu lo, i sawi ve tur a awm lo te min ti let ngam tiin hmeichhe scooty khalh buaithlak a tih thu traffic police in a sawi chhuah te ka hrechhuak uai uai.

Taxi driver te chu lirthei khalh te’n etiquette an nei tha i ti em? tih zawh an ni a.

“Awm leh mawi hi a awm ngai a nia, keini ho hi mamawh min ti a, kan inhrilh nasa a, hmeichhia leh rawlthar scooty khalh zinga tam takte hi hrilh tam an ngai ta ber a nih zawk hi, min hmusit emaw tih mai tur, an aia upa zahna tlahniam lan chhuahna a ni pakhatin ka hria,” tiin pakhat chuan a chhang a. “Hmeichhia hi a chuh helhah an tang lehnghal a,” tihte chu chhanna tlanglawn a ni bawk.

“Traffic police ber thiam loh hi a ni ka ti, hmeichhe lirthei khalh an duat lutuk a, dan an bawhchhiat pawhin man an tawk lo tlangpuia, hei hian a ti hluhlanga. an ngam tawh lo a nih hi ber hi,” tia chhanna chuan beng a verh ang reng hle.

Police hotu chuan an naute chu hmeichhe lirthei khalh dan bawhchhiate dim lo turin an fuih nasa thin niin a sawi thung a, “Dan hnuai leng vek kan nih avangin inang khat veka hremna pawh kenkawh tur kan ti thin,” a ti.

License pekchhuah khirh tawk loh vangin ‘etiquette’ a hniam phah niin chhanna a awm a. Transport department thawktute chuan license pek chhuah chu dan ang thlapa tih niin an sawi.

“Chhungte’n tihsak tura min ngen pawhin ‘hman loh chhuan lama exam loin zirtirtu hnenah matric certficate in dil bik em ni?’ tiin kan chhang tawh. Supreme Court on Road Safety Committee in min phut angin uluk taka test laktir an ni a. Dar zat bithliahin batch a thenin counselling pek an ni vek tawh bawk a. Driving test pass mai ni loin a fail-te thlengin an hming thawn thlak vek a ngai tawh,” tih director chuan a sawi.

“Tun hma kha chuan zin vei vahnaah pawh lirthei chhia a awm chuan kan dinga kan inpui tlang thin kha a ni a, tunah chuan chhiat vaih chuan min hlau emaw tih mai turin an tlan vang vang a ni mai. Kar hmasa mai khan Hmuifang piah deuha ka motor a chhia a, ka phar apiang an tlan tlang zela, darkar 2 hnuah pakhat ka phar ding hram,” tia chhanna pakhat kan dawn hian thu a va sawi tam si em!