Taxi pangngai two wheeler taxi ni lo thenkhat ZALEN in a biak te chuan Covid-19 hripui leng chu eizawnna ang zawng chuan  a tuar ber an nih an inrin thu an sawi a, patlingin cheng nuai tel man an thawhchhuahpui chung pawhin nikhatah labour hlawh hlawh phak loh chang an ngah tih an sawi hlawm a, mipui lam chet velna tlem ta lutuk chu an tawrh hle thu an sawi hlawm a ni.

Dawr inhawn chhawk an tih leh an tuar, tih an sawi a, tlan loh ni a a lo awm ve leh zel nen buaithlak an ti tlang hle. Chhungte mitthi vuina a veng danga kal vang vang an tlem a, Inneihna a kal an awm mumal thei tak tak tawh lo. Sikul naupang hruai tur an nei lo a, lam tur an awm lo bawk. College naupang nui bawk bawk phurh tur an awm lo a, office an lo inkalchhawk leh zel thin bawk nan an tan thil a buaithlak tan viau niin an sawi hlawm a ni.

Taxi driver pakhat ZALEN in a kawm chuan, “Hripui len hma te kha chuan keini lehkha thiam sang lem lo tan chuan inhlawhna tha ve pang-ngai tak a ni a, pang dama chhungkua kan awm te chuan harsa em em lovin a awm ve theih. Tunah erawh chuan nitin inhlawhfa labour hlawh pawh hi hlawh phak loh chang a tam ta mai. Nilengin kan tlan a, taxi petrol kan han thun a, a bang kan han chhiar a, a tlem duh khawp mai, nupui te hmachhawn  pawh hi chakawm loh thei tak a ni,” a ti.

Nitina hlawh bithliah a Taxi khalh thin pakhat pawhin, “Kan Pu ten ni khatah cheng za nga an hauh a, petrol kan kan thun zo a, kan pu te hauh zat kan han dah hran meuh hi chuan tah hi a chhuak rum rum thin. Patlingin zing atanga hna kan thawk a, zan thim hnuah te kan han haw a, kan pu te hnenah cheng zanga kan kan summit a, za li vel te kan han hlawh hi chu patling hi a insit theih khawp mai,” tiin ZALEN a hrilh.

Driver pakhat chuan, “Kan pu hian min hre thiam a, ka hlawhchhuah hi hmun thuma an then phawk a, hmun khat petrol man, hmun khan ka chan, hmun khat ama chan. Cheng 400 bawr vel ten kan han insem ta thin a, nuai tel man min hawlh chhuah tirtu pu te hmel hmuh hi chu hrehawm ve duh tak a ni. Oil man te Tyre man te a ngai ve leh zel tih kan hre ve kur a, motor lah chhe thei a ni tih zawng zawng nena ngaihtuah phei chuan inthlahrun hi a na duh tak zet. Hlawh tlem mah se, tih theih dang a awm chuang lo a, inhriatthiamna nen hian kan inchhawr ni ber hian ka hria,” a ti ve bawk.