Feature : Thir chhia, lehkha chhia & chhe dangte
Ka Pi/Pu tir-sia nei em?,” tih tawngkam hi hun engemaw chen atanga kan kawtthlera tawngkam tlang lawn tak, naupang te thleng pawha kan hriat tlang lawn tak a ni. Vai hovin kawngpui dungah leh kawng remchangah heng tawngkam hi an hmang rim hle a, anni hian thirchhia mai bakah, dar leh aluminium hman tlak loh te zawngin an vak kual thin a, Mizo naupang tam takin heng thirchhia, dar leh aluminium te hi kawr dungah te an zawn bakah mahni hman hnu, hman tlak tawh lo te heng vaiho hnenah hian an lo hralh leh thin. Tun hnai chhovah lehkha chhia lei khawm tur zawng pawh an awm chho leh ta nual bawk a, vai ho hian zawng ve tho mah se, lehkha chhia bik hi chu Mizo hmeichhe zingah lei tur zawng an awm ta nual mai.
Thirchhia tak hi chu Mizo zingah tak hi chuan lei tur zawng an tam lo hle a, Lehkha chhia erawh hi chu mimal mai bakah pawl ang te pawhin veng chhungah khawn an awm ve deuh reng. YMA ang te leh kohhran hrang hrang thalai pawl lam hian lehkha chhe lakkhawmin sum tuak nan hman an uar chho ta viau a, anni hi chuan lehkhachhia hi an lei meuh lo a, veng chhung mi ten rawngbawlna anga ngaiin an lo pekhawm mai a, anni hian an hralh chhawng ve leh ta thin a ni.
Mizoram bikah hian vai thirchhe zawng, kum 10 chuang awm tawh pawh engemaw zat an awm niin, vai thirchhe zawng pakhat chuan ZALEN a hrilh a, amah pawh hi kum 15 aia tam mah Mizoramah he eizawnna hi a kalpui tawh tih sawiin, mi dang pawh an awm belh zel tih a sawi a, mahse, tam tak chuan an thawk rei peih lo a ti. He vaipa hian a sawi dan chuan, a tir lamah chuan hla tak takah te kalin tuikawhna hmanga an lakkhawm thin thu a sawi a, tunah chuan a tam tham chuan taxi te an hman mai tawh thin thu a sawi a, hmun hrang hrangah hralhna tur a awm avangin a remchangah an hralh mai thin thu a sawi a, mahse, kalna thin lam an neih thu leh hralhna bik an neih thu a sawi tel.
Tunlai hian thir chhia leh lehkha chhia te hi Kg. 1 cheng 10 velin an lei tlangpui a, thir chhia bik pawh hi a thir a inan loh avangin a hralhna lamah leh an leina lamah pawh a man a inang thei lo. Lehkha chhia bikah hian chanchinbu chhia leh lehkha khawngho hi cheng 10-in an lakhawm tlangpui a, zirlaibu hlui angte hi chu a man a tlawm deuh thung a, a lo leisaktu lam pawhin an leina a inang lo. A lei khawmna hmunpui lam pawh hian lehkha chhia leh thir chhiate hi a zawngho leina ang deuh thovin an lei a; mahse, a zawngkhawmho leikhawm sa hi chu rate sang zawkin an leisak ve thin thung. Regular customer kan tih ang chite hi chu a nazawng nen chuan an leisakna hi a inang ngai lo.
Thir chhia bik hi chu ISPAT, Lengte-ah hralh vek a ni a, heng thirchhia ang bik ho hi chu Vairengte a pelh phalsak an ni lo a, chumai bakah Silchar leh a chhevela lei thin te pawhin Lengte-a a lei thin te leina bakin an lei sak bik ngai chuang lem lo niin, heng lakhawm thin dawr neitu chuan a sawi. Lehkha chhia bik hi chu Guwahati-ah an hralh tlangpui a, a chhan pawh Silchar leh a chhehvel-ah hian hralhna tur tha a awm chuang loh vang a ni. Lekha chhia leh a dangte hi an kudam (godown)-ah dahkhawmin phurh khawp a awm hunah an hrlahna lam hi an pan pui mai thin a ni.
He hmun a lo thir chhia, lehkha chhia, aluminium leh dar bakah motor battery la khawma Aizawl hmun hrang hrang, mimal in, sorkar office leh mimal/pawl hrang hrang office hmuna lehkha chhia la khawm thin leh, In thiahna hmuna thir chhia zawngkhawm thin Mizo nupa lo awmte chuan, “Helam hian Mizote kan harh thar a ngai tak zet a, heng inchhunga kan bungrua mamawh tawh loh leh hmanna tur hriat tawh lohte hi Mizopuite ngei hnenah hralh theih ni se tha kan ti khawp mai, hemi kawngah hian Mizote zingah eizawng tam tak kan awm tawh, lehkha chhia bikah phei chuan vai ho hi kan lan hneh hle tawh, thir chhia leh a dangah hi chuan hnam dang hian min la tam hneh deuh avangin hmalakna tur tam tak a la awm,” tiin an sawi.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024