A ngainaten an vulh a, thiltihhonaah a sa ei lova kim lova ngai an awm a, thenkhatten an humhalh a, thenkhatin In leh a vel vengtu atan an duh a, mahni chhungkaw mi ang maia enkawl thin pawl an awm. Ram kalna a hruai atan leh sa pel pui atana hmang thin, mahni thian anga en an awm bawk a, heng ho ang chi ni lo state pawn atanga a sa zawrh tura lalut pawl an awm a, heng an chawkluh duh lova, humhalh duh tlat ho an awm bawk a, anni ho buaipui ber hi eng dang ni lovin Ui a ni.
Buaipui dan inang lo tak tak zinga mi ni lo buai phah em em dang an la awm a, Ui seh avanga buaina hi Aizawl khawpuiah hian buaina tham a tling ta tak zet a, he Ui seh buaina hi a tawp mai dawn lo ni te pawh hian a lang a, vulh satliaha he kan ran ngainat leh buaipui tak hi ka vulh zel a nih chuan a seh tuartu lam pawh hi kan tam belh zel lo thei lo.

Aizawla Hospital hlun pathum atanga ZALEN-in kumin, January leh February-a Ui seh zat a lakkhawm atangin ni tin hian chhungkaw tam takah harsatna a thlen. Civil Hospital bik hian February 1-22, 2019 chhung khan Ui, Zawhte leh Sazu (Rat) seh avanga mi 136 chuang an enkawl a, Aizawl hospital leh Greenwood hospital hian January leh February-ah hetianga buaina hi tum 20 chuang ve ve an tawk bawk. Hemi atanga a lan dan hian nitin Ui seh avang hian mihring tam takin harsatna an tawk tih a lang.
Ui seh hi thih phah te pawh an lo awm tawh a, hei hi a seh nat vanga awm thei a nih laiin a sehtu lam natna vang te pawh a ni. Ui seh enkawl thuai hian pawi thui a thlen loh laiin ngaihthah vang leh a sehtu vanga buai chhunzawm te pawh an awm. Ui hi ngainat vang emaw lawm avanga ringawta vulh chi a ni lo niin, hetiang lam buaipuitu pakhat chuan ZALEN a hrilh a, ngaihven mai piah lamah ngaihtuah an ngai a, mihring ang bawka enkawl ngai an ni, tih a sawi.
Ui hian huat zawng an nei a, lawm zawng an nei bawk. Chhaihtu hi an hre hle niin, Ui lam chinchang hre tak chuan a sawi a, a neitu chu a mawhphurtu ber niin a ngai a, mi tam takin Ui an mawhpuh chu dikin a hre lo. Mihringin enkawlna kan mamawh ang bawkin ran phei hi chuan enkawl an ngai zual hle, a ti.
"Ka Ui hi kum sawm chuang a ni tawh a, kum hnih vel a nih lai kha chuan mi pawi teh pawh kan sawi thin a, mi kawng kal lai lo seh leh ham mai te hi a ching thin. Kei pawhin ka lo hriatchian tawk loh vang a ni a, mi thiam te ka rawn a, tlakchham a lo nei a, dawmdawi chi hrang hrang, rulhut damdawi thlengin ka pe a, a piangthar a ni ber," tiin Aizawla ran enkawlna hriat hlawh tak, JB Paws netitu Zirteii chuan a sawi a, control an ngaih thu a sawi bawk. "Za-a-zapakhata (101%) enkawl an ngai," a ti zui bawk.

Ui lam enkawl lama tawn hriat ngah, 'Dog Show' hmasa lama a ui 'Rooney' avanga hriat hlawh Sawma Sailo pawhin, "Enkawl thiam loh vang hi a ni ber, kan duat luatah hauh te kan phal lo a, hei hi a tha lo. Ui hian duat an hria ang bawkin, hauh hi an hre tur a ni," tiin, Ui kan enkawl danah hian an thatna ngaihtuah tul a tih thu a sawi. "Mi zinga kan talpui hnem dan leh kan buaipui dan a pawimawh, ran mah ni se, socialized an ngai," a ti zui bawk.
Naupang leh rualbanloh kan tih ang chi bakah hian Ui hlau hrim hrim te hi Ui hian a seh duh tih chungchangah Sawma chuan, "Mi thiam zawk ten an sawi danah chuan, naupang hi an hormone a la kim loh avangin Ui hian an hre hle a, Rualbanlo pawh an chetzia avangin an buai thin, Ui hlau hrim hrim te thleng hian an rim (smell) hriatna hian a hre hrang a, hei hi a chhan te pawh niin a lang," a ti. Ui hian lawm an hria ang bawkin chhaih nawmnah hi an hre thei hle a, mi an chhinchhiah thei hle, niin a sawi a, an huat zawng leh lawm zawng hi an an hre hrangin an lawmna leh huatna pawh an tilang thin niin a sawi.