Ui hi Mizote hian eng hunlai atangin nge kan vulh tan hriat mai a har a; mahse, hun rei tak chhung chu kan lo vulh tawh tih a hriat a ni.

Kan society-ah pawh thuk takin hmun a chang tih a hriat a, a sa pawh an ei thin tih a hriat bawk a. Kan society-a hmun pawimawh tak luahtu a ni tih hriatna chu rem thu sawina atan a ni a, inremna an neih dawnin sa ui an tan thin.

Khawvel hnam dang zingah hian ui sa ei thin hi an tam vak lo niin a lang a. Hmarchhak state-ah chuan Mizoram, Nagaland leh tlangmi dangte hi a eite ni maiin a lang a. Mizote bikah chuan ei duh lo tam tak an awm laiin thenkhat sa duh ber a ni thung a. Chhungkaw thenkhat, Pathianni tuk chawhmeha hmangte an awm a. Eng emaw thiltih khawm, a bikin mipa chaw eikhawmah chuan chawhmeh leklam ber a ni hial awm e.

Mahse, heti a ni chung hian ui talh lo tur leh a sa pawh zuar lo tura nawrna hi a awm ve reng a. May 16, 2019 khan khatih laia Lunglei DC chuan ui sa zawrh khapna order a chhuah a, hei hian titi a titamin order thlawptu leh dodalna an kat nuk mai.

Hun eng emaw chen thawm a daih hnuah June 20, 2023-a Mizoram State Animal Welfare Board thukhawmin ui talh leh a sa zawrh chungchanga dan hrang hrang, ‘Prevention of Cruelty to Animal Act 1960’ leh ran phurh chungchang, ‘The Transport of Animal Rules 1978’ te khauh zawka kalpui nise tia thurel an neih atangin a lar thar leh ta a ni. 

MSAWB thurel kal zelah August 23, 2023 khan JB Foundation chuan Aizawl Uisa Zuar Association-ah lehkha thawnin ui sa zuar tawh lo tur leh an signboard te la thla turin an ngen a. Registrar, Firms & Societies hnenah pawh Uisa Zuar Association registration pawh cancel-sak turin an ngen bawk.

Hetih lai hian mi thenkhat chuan ui sa zawrh khap ringawt chu Taliban rorelna ang hlea an hriat thu an sawi a. Pa pakhat chuan, “7th Day-te hian vawksa an ei loh avangin talh leh zawrh hi khap turin rawt ta se, chutiang zelin Hindu-ho hian bawng talh leh a sa zawrh hi khap ta se kan duh ka ring lo a. Chubakah chhungkaw tam takin eizawnna an chân dawn bawk a; chuvangin, mi thenkhatten uisa an ei loh mai avanga talh leh zawrh khap an ti hi chu an thlirna a dik lo hlein ka hria a,” tiin ZALEN a hrilh.