Vawk hi Mizo pipute atanga ranvulh lar tak a ni a, Mizote sa duh ber a ni hial awm e. Mizo society leh vawk vulh hi a inkawp tlat a, ruaitheh nikhua leh thil dangah pawh vawksa chu leklam ber a ni.

Hetih lai hian Aizawl khawpuia roreltu, Aizawl Municipal Corporation (AMC) chuan khawpui chhunga vawk vulh chu tihtawp tumin hma a la mek a, hei hian sawi zui a hlawhin thlawptu leh sawiseltu an inzat nawk mai.

2023 June thla-a AMC Board of Councillor thukhawmin an lo rel tawh angin January 15, 2024 atang khan Aizawl khawpui (AMC area)-ah vawk vulh hi khuahkhirh (khap) an tum a. Mahse, eng emaw bik harsatna neite tan vulh chhunzawm dilna (an vawk tihral hma) an hawng a. Dilna hi AMC-ah Rs. 10 emaw, an website-ah a thlawnin emaw download theih a ni a.

Dilnaah hian thil tel ngai neuh neuh (LSC xerox, NOC etc) a awm a, hengte hi vawk vulhtuten an fill-up hnuah local council hnenah thehlutin January thla chhung hian LC-ten a hlawmin AMC-ah an thehlut leh ang a. Dilna lutte hi February thlaah AMC leh local council-ten an enfiah ang a, harsatna bik nei leh vulh chhunzawm ngaite chu hun pek belh an ni ang.

Vawk pakhat vulh chhunzawm nan a neitu (vulhtu)-in Rs. 100 a chawi a ngai dawn a, vawkpuiah a note chhiar lovin vawkpui chauh chhiar a ni thung ang.

AMC hian khawpui chhunga vawk vulh tihtawp a tum chhan hi boruak rimchhia a tlem nan te, mipui hriselna atan leh lei min thin tihrehna atan te a ni a. AMC hmalakna hi mipui tam tak chuan an thlawp a, Aizawl khawpui chhunga local council thenkhat phei chuan an veng chhunga vawk vulh hi an lo khap tawh a ni.

Hetih lai hian AMC hmalakna thlawp lo pawh mi eng emaw zat an awm bawk a. Aizawl veng pakhata vawk vulhtu chuan, “AMC hian hetianga hma an la tak tak a nih chuan vawk note man leh vawksa rate hi a pung chho ngei dawn a. Chumai ni lovin vawk chaw zuara eizawngte a nghawng ang a, tun ai hian bawlhhlawh hi a pung ngei dawn a. Farm lian tak taka vawk vulhte hian an duh zat zat an chhiar tawh mai dawn avangin mi retheiten an tawrh ngei a rinawm a ni,” tiin ZALEN a hrilh.

Vawk vulhna hmun neitu pakhat pawhin AMC hmalakna a thlawp loh thu ZALEN hrilhin, “Vawksa hi Mizote sa duh ber a ni chungin kan la intodelh lo hle a. Hetia vawk vulh khap a nih chuan thenawm ram, Burma leh hmun dang atangin vawk kan lak luh a ngaih dawn bakah frozen hi tun aia tam daih a lo lut ngei ang a. Chu chuan hripui a rawn pu lut ngei dawn a, vawk vulhtuten nasa takin kan tuar thei a. Tun dinhmunah chuan la khap hrih loh hi a fuh ka ring zawk,” a ti ve bawk.