Kum engemaw zat kalta atang khan Krismas leh kumthar vuak vetah veng tam takin kawn leh hmun remchang lai chei kan uar tan a. Hei hi kan hunpui ti ropuitu a niin tlawhtu pawh an thahnem thei hle a, sawrkarin kawn/veng chei te tana lawmman a siam hnu ah phei chuan a cheitute an tang lehzual a. A hlawkna teltu ber chu mipuite an ni.

Kumin ah hian Tourism department chuan veng chei nalh/tha te hnenah lawmman itawm tham tak a tawktarh leh a, veng chei te chu YMA ah in hriattir tura an tih angin veng 19 ten an chei thu in report in chung mite chu Tourism, I&PR department, Central YMA leh MJA aiawh ten kawng hrang hrang in an endik a, veng chei tha ber hnenah hian lawmman nuai 5 pek a ni.

Veng chei lawmman chungchangah hian sawi neuh neuh eng emaw a awm a, a lawmman hi a tam lutuk tia sawisel an awm a. Hemi chungchangah hian Tourism department lam chuan veng chei lawmman chu khualzin te hipna atana thil tha tak anih avanga hetiang hi buatsaih an nih thu leh tun ang zela veng chei kan uar chuan nakin lawkah chuan khualzin mi tam tak hipluh ngei an beisei tih an sawi a. Tourist pakhat hian Mizoram a lo tlawhin a thlen man, ei man leh vahvelna ringawt ah pawh sum tam tak an seng nia sawiin tuna veng chei lawmman hi tam deuh angin lang mahse nakin zel ngaihtuah chuan a hlawk zawk hle dawn nia an hriat thu an sawi.

Veng chei thin pakhat chuan a hautak em avangin tuna Tourism department in lawmman an siam chu a tam lo tih a sawi a. "Veng cheina hmanrua te hi a man a to em em mai a, hei mai bakah tha leh zung sen ngai tam tak a awm avangin lawmman hi a tam lutuk ah ka ngai lo a ni," tiin Zalen a hrilh.

Veng chei hian tlawhtu an ngahin an buai thei hle a, duty te insiamin zan khaw tairek thlengin mipui leh lirthei vakvel tanpui hna thawktu pawl an awm a. Tun dinhmuna harsatna lian ber chu parking awm tha lo leh mipui punkhawmna hmun kan nei chau lutuk hi a ni. Hetih lai hian Kawn chei hlawk puitu zingah kawng sira thil zuarte hi sawihmaih chi an ni lo a. Mas lai hi mitin kan inphal hun lai a ni a, kawngkama thil zuar ten inhralh nuam an ti hle a.

Veng pakhat momo leh arsa hemhmin zuar chuan zantin Rs. 7000 atanga Rs. 10,000 inkar chu an hralh ngei ngei niin Zalen palai a hrilh.

Veng chei behchhana khualzin mi hipluh tum chu thil harsa tak nia a rin thu University Professor pakhat chuan a sawi ve thung a. "Krismas lai hi chhungkaw kima hman kan duh/tum hunlai a ni a. Kan veng chei hmanga tourist hipluh kan tum anih pawhin tun ang ringawta kan chei a, theme mumal awm lova kan ti anih chuan pantu kan neih tam a rinawm loh a. Chumai bakah Krismas lai hian a thawktu tam ber hi kan chawlh avangin hotel thlenna leh vahvelna chungchangah harsatna a awm thin a, kan kalphung kan thlak anih loh chuan tourist kan hipluh theih ka ring lo a ni," tiin Zalen a hrilh bawk.

Zalen palaiin hmun hrang hrang a tlawhna ah chhungkua, thianho leh mimal anga veng chei hi tlawhtu an tam hle a, a bikin naupang ten an hlimpui lehzual a ni. Hei hian intihhlimna kan neih chauh zia a entir niin a lang a, sawrkar hian mimal leh pawl te chawkphurin tun aia nalh leh uar zawka kawn/veng mai bakah mahni in leh a vel te chei ni ta se a nuam lehzual ngeiin a rinawm.