Femina Miss India World 2023 Nandini Gupta chuan vawiin khan an chenna Kota, Rajasthan a thleng ve ta a, ropui takin an lo hmuak. 

Rajasthan nula kum 19 mi Nandini Gupta hi Femina Miss India Wolrd 2023 atan thlan a ni a, a chenna lamah haw nghal mai loin tour neihpui zui a ni. Femina Miss India thlanna hi Manipur sawrkar chuan a thleng a, grand finale hi April 16 khan neih a ni. Grand finale neih zawh hnu hian tour an nei zui. 

Nandini Gupta hian vawiin khan an state leilung a rap ve leh ta a, airport-ah a chhungte leh thian thaten an lo hmuak. A hmelah a hlim tih hai rual a ni lo a, a nu leh paten an fanu rangkachak hi an lo lawm hle. 

Nandini Gupta hian Bollywood a luhchilh dawn a nih hmel a, actor Kartik Aaryan a thawhpui tur thu a sawi chhuak. Lala Lajpat Rai College, Mumbai-a business management a zir mek a, a kum pawh a la tam lo. Heti chung hian milar a nih miau tawh avangin zirlai a chhunzawm thei ang em tih hriat a ni lo, Bollywood a luhchilh a nih ngat chuan thawm a rawn nei lian chho viau mai thei.