K Lalrinchhana.

Mizo te hi kristian hnam tia sawi theih kan ni. Kristian kan nihna pawh kum za chuang fe a lo ni ta. Hetih rual hian kan kristianna hian kan nun a siam tha em? Kristian kan nih avang hian a tha lamin kan danglam em? Kristian ram kan nih avang hian kan ram hi a nuam sawt em? Kristian kan nih avang hian ringlo mi te aiin kan rinawm em? Kan nitin hnaah te kan taimak phah em? Thil siam zawng zawng hnena chanchintha hril tura thu pek kawltute hian ringlo mite mak tih tur khawpin kan ram lei lung, thing leh mau leh nungchate hi kan dimdawih em? An lakah zahngaihna kan lan tir em? Ngaihtuah tham tak a ni.

Rev Thansiama (L) khan, “Mizote kan pawnlan zia hi a thuk a ni” a ti a. Rev Lalsawma (L) pawh khan, “Kan ze nghehlohna lai tak hi kan nghehna chu a ni” a lo ti bawk a. Hun puma Pathian rawngbawl tura inpe, sakhaw puithiam te mahin hei hi kan hnam an hmuh dan a nih si chuan, kan kristiannaah hian kan nghet a, kan nun pawh a tak a ni lo ti ve chiam chiam tur pawh kan ni chiah lo.

Kan nun a nghet lo em em mai hi enge a chhan enge ni ang le? Kan inkhawm tlem vang ti dawn i la a hnam ang chuan keini tluka inkhawm nasa hi he khawvel ram zauah hian an awm chuang dawn em ni? Thawhtan zan atanga Inrinni zan thlengin zan awl awm mang loin inkhawm programme a indawt zut a, a kar lakah hla zir, committee, kohhran hnatlang a lo awm bawk a, huhoa kan chetna (activities) tam zawk hi sakhaw thil a ni. Kohhran-a inhmang tan chuan hun awl a awm mang lo. Kan inkhawm nasat avang hian kan nun hian belhchian a dawl sawt em?

Pathian thu kan hriat tlem vangin kan nghet lo ti dawn i la a rinawm chiah si lo. Keini tluka Pathian thu hria leh sawi nasa hi an awm chuang dawn em ni? Inkhawm apiangin Pathian thu kan ngaithla a, kan in hrilh char char a ni si a. Inkhawmnaah chang ni lo lungphunnaah te, pass lawmnaah te, inneihnaah te, mitthi vuinaah te pawh kan thu ngaihthlak tam ber chu Pathian thu a ni. Kawng sira zu rui thle mai mai pawh hi, ‘Pathian thu sawi rawh’ ti i la, hlam khat daih sawi tur an hria ang chu maw le. Mihring suala tluk thu te, kross thu te, chhandamna thu te, rinna awmzia te hi kan hre hneh khawp mai.

Kan piangthar lo a ni ang han ti dawn i la, a tua te mai pawh hi vawi khat na reng reng chu piangthar tawh, tu gospel camping-ah emaw inhlan tawh, Kelkang harhna chhim tawh, khawihthlukna chang tawh kan ni deuh vek mai. Kan inhmuchhuak zung zung a, kan da leh zung zung a ni ber mai.

Mizo te kan ngheh loh em em chhan nia lang pakhat chu  ‘fianrial nun’ kan hlamchhiah hi a ni. Han ngaihtuah teh ang. Zing thawh atanga zan kan mut thleng hian thawh hlim, mut dawn leh chaw ei dawna tihphung pangngai bel fahrana kan chham puat bak a hranpaa Pathian pawlna hun hmang kan awm chiah em? Awm pawh nise an tiam viau lo mai thei.

Babulon sal tang Hebrai tlangval Daniel-a chu ni tin Jerusalem lam hawia thingthiin Pathian hnenah vawi thum a inhlan ngei ngei thin (Daniela 6:10). Ni tin urhsun taka Pathian hmaa vawi thum tawngtai thin a nih avangin a rinnaah pawh a ding nghet a, a Pathian tan a rinawm bawk a, sakeibaknei hmaah pawh Pathian a phatsan mai mai lo. Rinnaa dingnghet kan tih te, Pathian mi hman rawngbawltu ropui kan tih te hi regular taka ni tin fianrial hun hmang thin te an ni tlat mai. Keini anga fianrial hun hmang tlem hi ni ve ta se Billy Graham-a meuh pawh kha Pathianin a hmang reng lo mai thei.

Fianrial nun hi pindan chhungril atang kher lo, kawnga kan kal lai te, mi dangte nena kan inbiak bawrh bawrh lai te, lirtheia kan chuan lai te pawhin a neih theih tho ang. Upa C Lalhluna (Bethehem Veng) hian a sawi ka hre reng mai, “Pathian hi kan rawn peih phawt chuan thil te tham teah pawh a inrawlh duh zel. Bazara thawmhnaw ka lei dawn te hian, ‘Lalpa ka duh zawng tak min lei tir ang che’ ka ti a, min chhang zel” a ti nia. Mite hian te lua awmloin Pathian an lo dawr a, kawnga an kal lai te, bazaar hmuanah te pawh fianrial hun an lo hmang zel mai a lo ni. A ropui ngawt mai.

Sam ziaktu chuan, “Kei zawng ka mu chu ka muhil ta a, ka han harh leh a, Lalpa chuan min lo chelh reng thin a” a ti a. Kan mutthilh lai pawha min chelh rengtu, kan lut leh chhuak min veng rengtu tan hian nikhata  minute tlem te kan serh hran ve chu a phu mang e.