Zu Zuar Fanu

Fanai Pictures kutchhuak 'Zu Zuar Fanu' film chu Ningani zan khan Vanapa Hall-ah tlangzarh a ni. Tlangzarhna hunah hian Vanapa Hall khat mawi tawk mipui an fuankhawm a, film enho lai pawhin thawm a tha thei hle. 

Zaithiam Kimkima leh Jenny Jathang te channa film hi darkar khat leh chanve vel a ni a, a story pawh a hlawm tha hle. Scene thenkhat phei chu a rei lo mah mah zawk em aw tih tur hial a ni a, a hmuhnawmin en man hla tak a ni. 

He film hi Champhai District-a Burma ramri depa awm Bulfekzawl khuah shoot a ni a, a khaw hmunhma a remin hmuh a nuam thin hle. A story nena inrem tak tak hmunhma tha tak a awm thei zel a, a film entinuamtu zinga pakhat a ni. 

A changtu Kimkima leh Jenny Jathang te an vawi khat channa ni mah se an thiam tak zet a, film dangah pawh hmuh tur awm zui zel se a duhawm hle. An director F. Lalrindika pawh film lamah tawnhriat a la nei tam lo chungin a kutchhuak a tha thawkhat a, hmabak eng tak a nei ti ila kan sawi sual awm lo e. Zu Zuar Fanu film hi Lersia Play app-ah en theihin a awm. 

'Kan Chhungkua'

In-House production film thar 'Kan Chhungkua' tih chu Inrinni zan khan Vanapa Hall-ah tlangzarh a ni ta. Kumina an film tihchhuah pahnihna hi Lersia Play-ah en theih a ni - kum tir lam khan 'Rini Leh Rina' an lo tichhuak tawh bawk a nih kha. 

Kuminah film chhuak thar a awm nual tawh a, entu pawh an tha thin hle. 'Kan Chhungkua' film tlangzarh zan pawh hian Vanapa Hall-ah mipui thahnem tak an fuan khawm leh a, rimawi hmanga Vanapa Hall khat an punkhawm theih meuh tawh loh laiin film en tur chuan hall khat mawi tawk an fuankhawm thei deuh zel.

'Kan Chhungkua' film-ah hian thalaite duh rawn Tommy Rosangliana (Lil Toto) kan hmu leh a, a part a rawn hnehsawh leh pek hle. Tleirawl duhawm Olivia pawh a naupan anga en ngawt chi a ni lo a, lemchan lamah chuan a puitling hle - Maruata Royte pawh a changthiam leh viau bawk. 

A hming put chhan ang ngei hian chhungkaw film a ni a, a tam thei ang berin en ila a duhawm hle. A hmuhnawmin zirtir a nei tha a, naupang atanga kum upa lam thlenga en ngei ngei chi film a ni. A hmuhnawm zia leh zirtir a neih that zia hre turin 'Kan Chhungkua' film hi en ve ngei rawh le.