Ningani leh zirtawpni khan Mizoram Premier League round hnuhnung ber 14-na zawh a ni a, Aizawl sang ber mah se an la champion lo. League ropui leh changkang tawhte ang ni lovin a hranpain final khelh a ni ang. Lungleiin chak nei lova vawi 13 an khelh zawn hnuin Zirtawp zan league hnuhnung berah Reitlang an hneh a, a mawngphah ni tho mah se tha takin tawp an khar thei. Final urlawkna Ninga zan khan final khel tur an ni tih inhre chungin Aizawl leh Chanmari intumin, 1-1 in an inhnehtawk. First half tawp dawnah B Zoramthara'n tauh lutin Aizawlin an thun hmasa a, minute 59-ah H Lalmuankiman pet lutin Chanmari si phurh a sut. League khelh 14-ah Aizawlin point 35 hmuin vawi 11 chakin tum khat an tlawm a, team pariat inel zinga sang ber niin league tir lamah final-a an tum tur Chanmari an hneh tawh a ni. Champion lai Chanmari'n point 32 hmuin vawi 10 chakin tum hnih an tlawm a, Aizawl tluk lo mah se title humhim thei turin hun tha an la nei. December December 9 leh 12-ah final khelin si belhkhawma sang zawk an nih chuan Aizawl khumin kum zawna champion hmasa ber an ni ang. Pathumna Police Mizoram Police-in league season tan fuh lo viau mah se khawng takin an khar. Zirtawpni khan si phur hmasa zawk mah se 2-1 in Chanmari West an hneh a, point 30 hmuin vawi 10 an chak a, fal takin pathumna an ni. All India Police Meet an khelh avangin MPL season tawp lamah mi dang aiin Police-in an khel muang bik. Mahse, Police Meet zawh hnua vawi li an khelhah chak fai vekin palina Chanmari West aiin point 12-in an sang a, pahnihna Chanmari aiin point hnihin an hniam. Chanmari West lakah Police-in nungchang ropui tak lantirin minute 83-ah F Lalrinpuia'n chhuih lutin, H Lallianzama tihluh hmanga first half tir lam atanga Chanmari West laka an si phurh a sut. Police-in nawr zui leh nghalin goalkeeper Lalthanpuia'n Lalfakzuala titluin penalty a chawi a, hnawh chhuah a ni bawk. Minute 86-ah Lalbiakhlua'n pet lutin league kal meka vawi kua a tihluhna a ni a, Chanmari striker Malsawmfela nen top scorer an ni dun. Tlawm mah se point 18 nei Chanmari West-in palina an luah nghet sa tawh. Point thum paihsak chungin season tan mah se kum kal ta aiin hma an sawn hle tih an lantir a, 2013-14 season-ah pasarihna niin MPL playoff hmangin top-flight huangah an kir leh hram. Dinthar an tlahniam MPL season hmasa ber 2012-13 champion Dintharin pangana ni chungin season an khar a, parukna Bethlehem Vengthlang nen point 17 ve ve hmuin goal difference vangin an sang zawk hram. Ningani khan Dintharin league kharin Bethlehem Vengthlang lakah 1-2 in an tlawm. Season tir lamah 2-1 in Dinthar an chak ve thung a, kai thar Bethlehem Vengthlang nen hian an chak zat, tlawm zat leh inhnehtawk zat a inang vek. Season liam ta khan dan a hranpaa final awm turin dan tihdanglam a ni. Dintharin title humhim zo lovin final an khel pha lo va, pathumna ni chungin season an khar a, hniam lam pan zelin tunah a chanve hnuai lamah awmin a hniam pali zingah an tel. Reitlang, Lunglei hniam fal Point nga kar danah a sang pathum Aizawl, Chanmari, Police an awm a, an inthlau lo. Team laihawl pathum Chanmari West, Dinthar leh Bethlehem Vengthlangte point hnih chiahin a daidan. Pathumna leh palina inkarah point 12 a awm a, chutih laiin point thum paihsak lo se Chanmari West-in point liin Dinthar an kalsan ang a, Police nen an inkarah point kua a awm ve thung ang. A mawng pahnih Reitlang leh Lunglei erawh an hniam viau a, pasarihna Reitlang aiin point 11-in parukna Bethlehem Vengthlang an sang. An awmna tur hre chiang sa chungin Reitlang leh Lunglei an inkhel a, minute 48-ah ZD Laltlansanga'n thunin mualpho taka Lungleiin season an khar tur tiziaawmin, league khelh 14-ah point li an hmu. Vawi khat ve ve chiah Reitlang leh Lunglei an chak a, chu pawh season tir lamah Reitlangin Lunglei hnehin league kharnaah Lungleiin Reitlang an hneh ve leh a, season tluanin a mawngah an inel dun. Reitlangin point ruk hmuin vawi 10 an tlawm a, MPL khel zui zel turin playoff an khelh a ngai dawn. Season khat bak top-flight huangah Lunglei an inhambei zo lo va, vawi 12 tlawmin tum khat chakin vawi khat an inhnehtawkpui bawk a, Reitlang aiin point hnihin an hniam.