June 1, 2022; Mizoram sawrkar hnathawk pawl hrang hrangte intelkhawmna, Federation of Mizoram Government Employess and Workers (FMGE&W) in, Dearness allowance (DA) pung chungchang a May, 2022 chhung sawrkar hmalakna an ngaihchan hnu-ah, vawiin thlengin thu lawmawm an la dawng lo a, an sawilawk tawh angin, tun thla ah general council meeting ko vin, an hmalak zel dan tur an ngaihtuah dawn. 

FMGE&W hruaitute hnen atanga ZALEN thudawn danin, DA pung chungchang a May thla chhung sawrkar an ngaihchan chhungin, thu lawmawm lam sawrkar atanga dawn an nei lo a, hetihlai hian sum harsatna vang a an duhna te tihhlawhtlin mai a harsat thu erawh sawrkarin chhanna an dawng thung.

FMGE&W executive meeting chuan May 18, 2022 khan DA pung chungchang a ngaihtuah a, May, 2022 chhung sawrkar hmalakna ngaihchan leh phawt nise, an ti a, hmasawnna a awm loh chuan June 2022 ah general council meeting ko vin, hmalak zel dan tur ngaihtuah nise tiin an rel a, an thil phut chu chief minister hnenah an thlen nghal a ni.

FMGE&W chuan sawrkar a hnathawkte inkara tul lova innawr emaw, boruak thalo thleng palh a awm ang tih chu an phak tawka an venthawn reng thu CM hnen a an thu thlenah tarlangin, hemi vang hian DA pung chungchang chu ngaihpawimawh sak tura an ngen nawn thu an tarlang bawk.
    
DA chungchang:

DA hi sawrkar laipui hnathawkte rate ang state sawrkarin pek ve zel tur a ni.

Sawrkar laipui hnathawkten July 1, 2021 atangin DA 31% an lak tawh bakah, January ni 1, 2022 atangin 3% a tihpun belh tur a nih tawh laiin, Mizoram sawrkar chuan 17% a pe mek.