Aizawl:  Mizoram sawrkar hnuaia hna-thawk inzawmkhawm pawl Federation of Mizoram Government Employees & Workers chuan sawrkara an thilphut chi hrang hrang DA tihpun, a hun taka hlawh lak leh pension te a hun taka an hamthatna pek te phutin lungawiloh lantir an tum.

Zirtawpni kalta chawhnu dar 2 khan Conference Hall, Directorate of Economics & Statistics ah FMGE&W hian meeting an nei a. Meeting ah hian sawrkar hnathawkte chanvo DA pung chungchang sawr-kar-ah ziaka vawi 4 an thlen tawh hnu leh tawngka pawha Sawrkar hotute vawi tam tak an dawr hnu pawha tihhlawhtlin a la ni lo chu a lungawithlak loh hle tih an sawi a. Central sawrkar hnathawkte DA rate hman ang pek ve an duh tih an sawi.

Hei bakah hian Supreme Court Judgement CA No 399 of 2021 dt 8.2.2021 chuan sawrkar hnathawkte chu an chanvo a nih ang taka a hun taka hlawh pek thin tur an nih thu leh pek tlai an nih pawhin interest nen pek an nih tur thu a lo tichhuak tawh tih sawiin Mizoram sawrkar hnathawkte pawh a hun taka hlawh pek zel an duh tih an sawi bawk a. Sawrkar hnathawk chawl (retire) ten an chanvo diktak Pension leh Retirement Benefits dangte sawr-karin a pe mai thin lo nia sawiin an chawlh ruala an hamthatna te hi dawn nghal an duh tih an sawi bawk.

FMGE&W chuan a chunga point pathum te avanga an lungawilohna lantir nan leh sawrkarin a tihhlawhtlin sak thuai phut nan Feb. 21-25,2022 hian badge dum bel vek nise an ti a. An hmalak zel dan tur rel turin Dt. 1.3.2022 ah FMGE&W Council Meeting koh ni se an ti bawk.