Aizawl August 25, 2024 : Mizoram sawrkar hnathawk inzawmkhawm pawl, Federation of Mizoram Govt. Employees & Workers (FMGE&W) chuan Mizoram sawrkarin pay commission din thar tura thutlukna a siam chu ram tan thil tha nia an hriat loh thu sawiin state pay hran siam lova tuna kal dan anga kal an duh tih thlen ni se an ti.

FMGE&W hian Zirtawpni khan Dawrpui Multipupose Hall-ah Special Conference an hmang a. Mizoram sawrkarin pay commission din a tum chu new recruits tan chauhva siam pawh ni se technically-in thil remchang lo a awm bakah dan mit atang pawhin him lo a awm thei niin an hria a. Special conference-ah hian sawrkar hnathawk health facility CS (MA) Rules 1944 anga kalpui thin chu sawrkarin Revised Health Care Scheme hmanga kalpui a tum chungchang ngaihtuah a ni a. Revised Health Care Scheme-ah hian thil chiang lo tam tak a la awm a. Hengte chin fel a nih hma chuan sawrkar hnathawkte telh ve rih lo turin sawrkar hnenah thlen ni se an ti.

Hei bakah hian Council of Ministers-in sawrkar hnathawkte dearness allowance (DA) chungchang ngaihtuah zel tura tih chu ennawna tun hma kal dana kal turin sawrkar an ngen tawh a, ngen leh ni se an ti a. DA hi an pay rules ang chuan central sawrkar rate anga kal tur an nih laia Council of Ministers meeting-in April 1, 2025 atanga 2% chauhva tihpun tura a rel chu lungawithlak loh an ti a, sawrkarin year of consolidation a hman hre chungin pay rules anga central sawrkar rate pawh phut ngam lovin July 1, 2024 atangin 4% tala tisang turin ngen ni se an ti a, a nawr zui zel dan tur chu executive committee kutah a dah.

FMGE&W Special Conference chawhma hun hi an vice president Lalchuailova’n a kaihruai a, 1st Session-ah Addl. Secretary Finance Department Ramchuana leh Dr.Biakthansangi, Healthcare Society CEO ten revised healthcare an sawi a, zawhna leh chhanna hun hman niin, chawhnu lamah an pawl president, R.Lalrammawia kaihhruainain rorel a ni.