ZALEN July 27, 2023 ; Mizorama sawrkar hnathawk inzawmkhawmna pawl, FMGE&W-ten pension kum atan kum 62 hmang tura sawrkar an ngenna chu an dinna a la ni reng a. Hetihlai hian sawrkar hnathawkten a hma aiin hlawh an la hma chho tan mek zel nia thudawn a ni.

Federation of Mizoram Government Employees & Workers (FMGE&W) hruaitute hnen atanga ZALEN thudawn danin pension kum bithliah thar chungchang sawrkar a an thlen chu ‘phutna’ ni loin, ‘dilna’ a ni a, a hlawhtlinna an hmuh pawh an beisei.

Pension kum bakah hian thla ruk dan zela DA tihpun thin chungchanga sawrkar a phut an neih pawh an dinna a la nih reng thu te, a hlawhtlinna an hmuh hma chuan nawr zel an tum thu FMGE&W hruaitute chuan an sawi.

Hetihlai hian FMGE&W-ten a hun taka hlawh lak an beisei angin Mizoram sawrkar chuan a hnathawkte hlawh a pe hma chho zel nia thudawn niin, department thenkhat, IFMIS vanga la tlai hret erawh an la awm thin nia thudawn a ni bawk.  

FMGEW hian May 19, 2022 khan an thil phutte ziakin Chief Minister Zoramthanga hnenah an lo thlen tawh a, an thil phut zingah chuan pension hun kum 60 atangin kum 62-a tihsan a tel a. Sawrkar laka lungawi lohna lantir an tum tawhna thina an thil phut zingah pension kum tihsan a lo tel tawh thin bawk.