Aizawl;  Sawrkar hnathawk inzawmkhawm pawl, Federation of Mizoram Government Employees & Workers (FMGE&W) leh Federation of Mizoram Samgra Employees (FEMSE) chuan an thil phut chungchangah sawrkar an ngaichang mek.

FMGE&W chuan an DA (dearness allowances) 34% a tihpun ngiatin kar kalta khan bagde dum an bel a. Mizoram hnuaia sawrkar hnathawkte hian DA hi 28% an la mek a, DA pung hi hman thuai an phut a ni.

ZALEN-in FMGE&W hruaitute a biaknaah DA pung an phut chu rules-a inziak a nih vang a ni tih sawiin tun kar chhung hian an kal zel dan tur rel leh an tum tih a sawi.

FEMSE hian an hlawh tihpun chungchangah naktuk hian cabinet meeting a awm dawn nia an hriat thu sawiin an thuchhuak an ngaichang mek niin an sawi a. “June 10, 2022-a FEMSE inkhawmpui kan neihah chief minister-in kan hlawh a pun ngei tur thu a sawi laiin finance department chuan min dang niin kan hria a. Naktuk hian cabinet an thukhawm dawn niin kan hria a, an thuchhuak azirin council meeting neiin kan kal zel dan tur kan rel ang,” tiin FEMSE hruaitu pakhat chuan ZALEN a hrilh bawk.