Aizawl: PRISM party chuan Indian Forest Act siamthat tumna chung-changa Mizoram sawrkar chet dan chu demawm an tih thu sawiin awmze neia hma la nghal turin an duh tih an sawi.

Nimina thuchhuah an siamah PRISM chuan Indian Forest Act chu siam that tum a niin hemi atan hian Draft Bill pawh hun rei tak kalta khan siam fel a ni a. Mizoram sawrkar hnenah he Bill duan hi rawn thawnin ram pum huapa inrawnkhawmna nei turin an ti a. Inrawnkhawmna neih hun tur thla khat chuanga a pelh hnuah pawh inrawnkhawmna buatsaih a la ni lo nia sawiin demawm an tih thu an sawi.

Bill hlauhawmna sawiin rambuai laia sipai in an rinhlelh te an duh duha an man a, an in an dap a, an duh phei chu an kaphlum thei ang khan Forest Department chu he dan tharah hian thuneihna pek tur nia sawiin tihpuitlin a nih chuan mipui an chep hle dawn a. Rambuai laia mipui min sawisakna Dan Armed Forces Special Power Act ai khan a hlauhawm hial a. Kan sawrkar hian mipui nekchepna tur hi a dodal ngei ngei a ngai tih sawiin hemi chungchangah hian ram pum huapa inrawnkhawmna buatsaih nghal turin sawrkar an duh tih an sawi bawk.