ZALEN January 27, 2024 : Vawiin khan Zodintluanga Ralte, Ex-Minister leh Anggu Lalhmachhuana, Secretary MPCC te'n Vairengte Forest Check Gate an tlawh a. Hmunphiah chingtute harsatna a hmunah enin an harsatna an zawtfiah a. Mizoram sawrkarin Vairengte Forest Check Gate-a Hmunphiah an kaltlang tir lo chu a rang lamin enfiah se a ti a, kuthnathawktute hmuhsitna a ni, an ti.

Zodintluanga chuan, "Kum dangah chuan tun ang hunah hian a man (rate) sâng tak takin an hralh tawh ṭhin a. Sawrkarin an tan hmalakna a nei lo hi Vairengte Kut hnathawktute harsatna lian tak a ni bawk. Hmunphiah hringa hralh tur nei an nih deuh vek avangin hmunphiah hralhnaah harsatna an tawk nasa hle a, Vairengte Forest check gate-a a kaltlang thei lo hi a lungchhiatthlak hle a ni," a ti bawk.

Zodintluanga Ralte chuan Vairengte kut hnathawktute harsatna ngaithlain, "Mizoram sawrkar kut hnathawktu ngai pawimawh inti sawrkar thar, kalphung thar tia mipui hnena inzuar te'n Vairengte Hmunphiah chingtute a ngaihthah hi Mizoram mipui zah lohna leh hmunphiah chingtute hmuhsitna a ni. A rang thei ang bera Vairengte Hmunphiah chingtute harsatna sutkian sak turin Chief Minister ka ngen a ni," a ti.

Zodintluanga Ralte chuan, "Hmunphiah hi a keh hunlai tak niin, a par tawh chuan kg 1 cheng 8 bawrin an hralh thei chauh a. Aman a tlahniam nasa hman tawh hle thin a. Hetiang anih avang hian sawrkar thuchhuah nghakin an hmuhphiah pâr tur hi beidawng takin an thlir mek a. Sawrkar tharin hmunphiah chingtute tana thutlukna a la siam theih loh avanga an harsatna hi a rang thei ang bera chinfel sak turin Mizoram sawrkar ka ngen a ni," a ti bawk.