August 22, 2023; Forest Conservation (Amendment) Act, 2023 dodalna resolution, Forest minister TJ. Lalnuntluanga put luh chu Mizoram Legislative Assembly in a pawm.

Vawiin resolution a put luh khaikhawmna a neiha Forest minister sawi danin, an hriattirh atangin hma an la nghal a, October 2, 2021 ah Central sawrkarin an ngaihdan a rawn zawt a, meeting neih nghal a nih hnu, October 21, 2021 ah an duh loh thu Central ah ziak a thlen nghal a ni.

Forest minister chuan kumin June ni 6 ah ah duh lohna an thlen leh tih sawiin, Lok Sabha Secretariat ah PCCF hming a an thlen thu te leh JPC ah pawh an thlen thu te a sawi. 

"Central ah a tam lam an ni a, kan duhthusam a thleng thei ta lo a, Mizoram a kan ram humhlahna tur leh thing leh Mau chereu mai tur humhalhna tur atan hian, lehkha leh thil dang tam takin a tir atanga hma kan laknain awmzia a neih tak loh avangin Mizoram a rorelna sang ber House ah a dodalna kan pulut a ni," a ti.

"He MNF sawrkar hian hnam issue leh kan ram leh hnam khawih thei tur ang chi ah chuan tlanchhiat tum loin, a bul atanga a tawp thlengin hma kan la a, CM thurawn angin Assembly ah resolution kan rawn pulut a ni," a ti bawk.

Hemi hnu hian Speaker Lalrinliana Sailo in vote lain, pass remti an tam zawk a, Forest Conservation Ammenmend Act, 2023 dodalna chu Mizoram Legislative Assembly ah pass a ni ta a ni.