Aizawl January 4, 2023 : DIPR Minister Lalruatkima chuan vawiin khan Ebenezer hospital, Chawnpui-ah a mamawhte tana hman tur ventilator a hlan a, Minister chuan ventilator pek a nih theih nana hmalatu Formosa Foundation chungah lawmthu a sawi.

Ventilator hlantu Minister chuan Formosa foundation te thil tih zawng zawng ah lawmthu a sawi a, hun harsa kan tawn laia NGO dang te pawn an thil tih a ropui a tih zia a sawi a ni. Formosa foundation ten an thil hlan hi Ebenezer Hospital ten mipui rawng an bawlna atana hmanraw tangkai tak a nih ngei a rin thu a sawi.

Formosa Foundation hruaitute chuan Minister hi an tawiawm a, Ebenezer Hospital hotuten lo dawngsawngin hospital conference hall ah hlanna hun hi hman a ni. Formosa Foundation chairman Jonathan Lalremruata chuan he hunah hian technical report a pe a, Ventilator hi Ebenezer Hospital MD Dr Vanlasiama'n a dawng a ni.

Formosa foundation hian Mizoram chhunga hospital hrang hrangah ventilator an hlan tawh a, oxygen concentrator pawh 550 an pe tawh bawk a ni. Heng bakah hian Covid-19 dona atan leh hman atan PPE kit te, mask te, RT-PCR kit te pawh thahnem tak an pe a. Covid-19 vanga harsatna tawk chhungkua 14192 tan ration an khul sak tawh bawk a ni.