Aizawl January 20, 2024 : Mizo tleirawlte ruihhlo laka ven hna thawktu tlawmngai pawl, Foundation For Drug-Free Mizoram chuan vawiin hian Aijal Club ah Dialogue neiin kum 2024 chhunga an pawl rawngbawlna a ki peng pawimawh tak, Resource Person an thlanchhuah mithiam 12 te Pathian hnena hlanna hun an hmang a, an pawl adviser Upa R. Lalmalsawma'n tawngtaina a nei.

Foundation For Drug-Free Mizoram-ah hian medical doctor te, clinical psychologist te, politician te, psychiatrist te, kohhrana ordained Minister leh Officer te, psychologist te, social worker te, nurse te, brain gym professional te, educationist te, philantropist te leh drug addict pension tawh te an tel. Kum kal ta a, School leh Sunday School a rawngbawlna nei a an fehchhuah tawhna te thlirletin; hmasawn tulna lai ni a an hriatte rilru inpawh takin an sawi.

Resource Person tura an sawm te chuan tum thuhmun leh Thuchah Thuhmun nei a an fehchhuah theih nan Kalphung thar leh inang tlanga zawm tur inkaihhruaina dan thar an siam a, Finance Committee a mawhphurtur te an ruat bawk. Pawl anga hmun an tlawh tawhna zawng zawng dinhmun zirchianna leh chhutzuina, feedback form siamin March thla chhunga lakkhawm an rel.

Foundation For Drug-Free Mizoram hian April thla atangin fehchhuah programme hi Mizoram hmun hrang hranga zirna in leh Kohhran Sunday School leh Tleirawl Inkhawmah te kalpui turin ruahmanna an siam bawk a, Kohhran leh Zirna In tinah hun hmang tura sawm theih an ni. Vawiina dialogue neih hi an pawl Senior Vice President Remliani Chawngthu chuan a kaihruai.