Aizawl January 9, 2024: Vawiin khan Chief Minister Lalduhoma chuan a pisaah Foundation for Drugs Free Mizoram hruaitute kawmna a nei a, an hmalak dan hrang hrang te a ngaihthlak sak a, Drugs laka Mizoram a fihlim theihna atana hmalatu te chuan, tleirawl 12,500 ten ruihhlo laka fihlim turin signature card ah an lo intiam tawh tih an hrilh.

Chief Minister chuan, sawrkar tanpuina tel lova member inphalte thawhkhawm liau liauva hmalakna tha tak tak an kalpui avangin lawmthu a sawi a. An hmalakna ten rahtha a chhuah ngei a beisei thu hrilhin zau zawka hma an lak zel theihnan duhsakna a hlan a. Ruihhlo ngaite chhanchhuahna tur atana sawrkarin hma a lak tawh chinte pawh a hrilh a ni.

Foundation for Drugs Free Mizoram President V. Lalnunthara, chuan an pawl hi kum 2019 a ding an nih thu leh ruihhlo ngai tawh te enkawl lam aiin tleirawl la fihlim mek te ruihhlo bawiha an luh loh nana invenna lama an beih nasat zawk thu a sawi a. An pawl member te thawhkhawm sum hmangin mithiam zawkte sawmin Team of Resource Persons an din a, anni hmang hian kum 4 chhungin School leh kohhran hmun 66 tlawh tawhin; tleirawl mi 12,500 te ruihhlo laka fihlim turin signature card ah an lo intiam tawh tih a sawi.

He pawlah hian Lalduhoma hi kum kalta atangin Patron Member a lo ni tawh a, an Patron member Chief Minister ni ta an lawmpuizia entirnan thilpek an hlan nghe nghe a ni. Tunah hian member 950 an awm mek a, an zingah hian MLA nilai 11 an tel a ni.