Aizawl January 22, 2024 : Vawiin chawhnu dar 3 khan MZP General Headquarters chuan, Myanmar leh India ramria zalen taka inkalpawhna, Free Movement Regime (FMR) hlih tum duh lohna leh Myanmar leh India inkar ramri hung tum duh lohna Memorandum India Prime Minister hnenah a thehlut a. Memorandum hi Mizoram Governor kaltlanga thehluh a ni

Governor Dr. Hari Babu Kambhampati zin lai a nih avangin a aiawhin Secretary to Governor, Mizoram V. Lalsanglianan a lo dawng a ni. Memorandum thehluh zawnah chanchinbu mite zawhna chhangin, MZP President H. Lalthianghlima chuan, MZP-in Zofate daidang tur FMR leh ramri hung hi dodal zel tum a nih thu a sawi. He lekha hi; Vice President of India, Union Home Minister, Governor of Mizoram leh Union Home Secretary hnenah pawh pek a ni bawk.

Memorandum

"Mizo Zirlai Pawl chuan India leh Myanmar rama Zofate chengte then darhtu tur, Indo-Myanmar ramri-a kan inkalpawhna Free Movement Regime (FMR) leh Indo-Myanmar ramri hung chungchang kan ngaih thutak thu leh kan dodal thu kan sawi a ni.

"Zofate hi British hunlai atang tawhin administrative division hrang hrangin min inthen darh a, India zalen hunah pawh international boundary-in min ṭhendarh bawk. Hetianga inthenna awm mahse, India sawrkarin Free Movement Regime a siam avang hian kan la inpawh hle a. Chhiatni thatniah, sakhua inkhawmah te kan la in zawm tlat a. Tun hnaiah hei hi sawrkar-in tihtawp tura thutlukna a siam hian kan hnam inpawhna a tibo dawn a, khawvel hmun hrang hranga hnam dangte ang bawkin kan dikna chanvo ka hloh dawn a ni.

United Nations Declaration on the Rights of Indigenous Peoples 2007 (UNDRIP) Article 36 na-in a sawi ang leh India sorkarin a support angin, Ram leilungfa international boundary-a inthen darh te chu ramri kaltlanga inbiakpawhna, inlaichinna, leh thawhhona, thlarau lam, nunphung, politics, sum leh pai, leh khawtlang thila - inzawmna, inlaichinna leh thawhhona vawn him leh tih hmasawn a tum thu a sawi chiang hle a ni.

Heng te avang hian India sorkar chu a thutlukna ngaihtuah nawn leh turin tih tak zetin kan ngen a ni. Ramri hunga in thendarh kherlo hian ruihhlo leh a kaihhnawih tawlhrukna chungchangah hian ngaihtuahna fim tak hmanga a chinfelna tur kawng dang zawn theih a ni tih kan ring.

He kan ngenna avang hian in ngaihtuahna min sen nawn saka, ngaihtuah nawn leh turin kan ngen a. India leh Myanmar ramri kaltlanga Zofate nunphung leh khawtlang nunphung humhalh turin kan ngen a ni.