G20 Summit: A hma ni hnihah Biden-a’n India thleng dawn
US President Joe Biden chu G20 Summit-a tel turin India-a a zin dawn a, intawh khawm tan hma ni hnihah Delhi thlengin Prime Minister Narendra Modi nen an lo inkawm hmasa dawn niin White House-in a puang.
G20 president nihna chelh mek, India hian September 9-10 chhung hian Delhi-ah summit a thleng dawn a ni.
Ninganiah hian President Biden-a hian New Delhi a thleng dawn a, G20 Leaders’ Summit-ah a tel dawn tih Zirtawpni khan White House chuan a puang.
Zirtawpniah hian President Biden-a hi Prime Minister Modi nen an inkawm ang.
Inrinni leh Pathianniah president hi G20 summit-ah a tel ang a, hetah hian G20-a an thawhpui hruaitute nen khawvel huap thil pawimawh hrang hrang - clean energy transition leh sik leh sa inthlak nasa lutuk beih let dan tur te an sawiho dawn a ni.
Russia-Ukraine indonain mipui leh eibar a nghawng dan leh hma lak dan tur te, World Bank pawh telin development bank hrang hrangte kaltlanga retheihna um bona tura thawh dan tur te leh khawvelin chona a hmachhawn mek dangte beih let dan tur an sawiho bawk ang.
New Delhi-a a cham chhung hian President Biden-a hian Prime Minister Modi-a’n G20 a hruai dan pawh a sawi zui rin a a ni bawk.
G20 an tih hi khawvel ram hrang 19 leh European Union telna a ni a, kum tin president nihna hi a tel ramten an inchelh chhawk thin.
India hi kum 2023 chhunga president a nih angin summit a thleng dawn a, summit pui ber hma hian a hnuaia peng hrang hrang intawh khawm pawh a thleng nual tawh nghe nghe.
Summit a thlen tur inbuatsaihna leh enchhinna hnuhnung chu Inrinniah Delhi-ah neih a ni a, lirthei kal a buai phah hle.
Latest News & Chhiar Hlawh
-
1m | May 06, 2024
-
2m | May 06, 2024
-
2m | May 06, 2024
-
2m | May 06, 2024
-
1m | May 06, 2024
-
1m | May 06, 2024
-
1m | May 06, 2024
-
1m | May 06, 2024
-
3m | May 06, 2024
-
1m | May 06, 2024
-
1m | May 06, 2024
-
2m | May 05, 2024
-
1m | May 05, 2024
-
2m | May 05, 2024
-
2m | May 05, 2024
-
4m | May 05, 2024
-
1m | May 04, 2024
-
2m | May 04, 2024
-
2m | May 04, 2024
-
1m | May 04, 2024