September thla tirah India chuan Delhi-a khawvel ram lian 20-te intawh khawm a thleng dawn a. Inbuatsaihna kalpui mek niin venhimna khauh thei ang ber bakah ambulance 130, kang thelh motor 66 zet nen a inring dawn.

Hriselna thila rikrum a awm palha che turin doctor team pariat inrintir an ni ang a, ambulance  rualin an inchhawp dawn.

G20 Summit thlen tura inbuatsaihna thlir hian Ningani khan Delhi Lieutenant Governor V K Saxena hovin an thukhawm a, ni sarih lo awm leh tur chu September 9-10 chhunga inkhawmpui an thlen tur inbuatsaih nana ni pawimawh a ni tih a sawi. 

LG chuan sorkar thuneitute chu venhimna kawngah pawh a khauh thei ang ber kalpuia mi firfiak, biological, chemical leh thil dang hmanga chet thawh tum ang zawng zawng thleng thei laka him tura inbuatsaih turin a ti.

LG chuan G-20 logo leh a tel tur ramte hnam puanzar zar chu kawtthler leh kawngpui bakah Palam Technical Area, hotel leh summit neihna turah tan a hun tih a sawi.

Hmun thlan bik pariat bakah hmun hnih dang tihbelhah puanzar hi zar tur a ni dawn a. Khawel huap pawl puanzar nen a vaiin puanzar 43 zar tur a ni ang.

Kang thelhna khawl ringawt pawh 66 inrintir a ni dawn a, hei hi summit neihna tur hmun, Pragati Maidan leh khualbuk pawimawh bik bulah inchhawp a ni ang.

Tun kar lo awm tur atang hian kawngpui leh kawtthlera chhinchhiahna (sign) tar hna thawh tan a ni dawn a. Police-in heng hmunte hi tihhmelhem a nih loh nan an veng zui nghal bawk ang.

Khawlaia bawng leh ui tla thin zawng zawng pawh a awm loh nan hma lak a ni mek a, hemi hna hi tual chhung rorel khawl nen tangkawpin sorkar hotuten an thawk mek.

Sorkar damdawi in tin inrintir an ni a. Doctor rual leh damdawi thiam 80 awmna team siam niin damdawi in tinah team thum zel inring reng tura dah an ni dawn a ni.