India-in G20 Summit a thlen chu Inrinni khan tan a ni ta a, a hawnnaa sawi hlawh tak chu ‘Bharat vs India’ bawk a ni a. A hawnnaah hian Prime Minister Narendra Modi hmaa a ram aiawh inziahnaah ‘Bharat’ tia ziah a ni.

Delhi-a G20 Summit neih mekah hian a hmain President Droupadi Murmu-i’n palaite zanriah kilpui tura a sawmnaah India president inti lovin Bharat president tiin sawmna sem chhuah a ni a, sawi zui a hlawh hle.

Tun thla chawhnu lamah hian parliament special session koh zui a ni a, hetah hian India hming chu Bharat tia thlak turin sorkarin a chhawp chhuak dawn nia sawina thawm a ring zui nghal hle.

‘Bharat’ tih hi G20 booklet hming atan pawh hman niin ram dang atanga palaite hnena semah hian ‘Bharat, The Mother Of Democracy’ tih hming puttir a ni a. “Bharat hi ram hming a ni a, danpuiah pawh ziah lan niin 1946-48 pawh khan lo sawiho a ni tawh,” tiin booklet-ah hian ziah lan a ni nghe nghe.

India tih aia Bharat tih hman a ni hi eptute chuan an sawisel nasain Modi-a sorkar an beih nasat phah hle a. Eptu tangrual, INDIA-a tel party thenkhat chuan BJP sorkar hian ‘India chanchin hlui thai bovin ram a then darh’ niin an puh.

Hetih lai hian BJP hruaitute chuan eptute hi ram do leh dan lo ang zawnga che niin an puh let a. Danpuia Article 1-ah pawh Bharat chu dah a ni tih an sawi.

Union Minister Dharmendra Pradhan chuan ‘Bharat’ tih hi miin India an awp lai hming duh lohna avanga han niin a sawi.

G20 an tih hi khawvel ram changkang 19 leh European Union telna a ni a, kum tin president nihna hi a tel ramten an inchelh chhawk thin a, India hian a chelh mek.

Inrinni leh Pathianni hian summit hi Delhi-ah nghah a ni a, anmahni ram bil bakah khawvel huap thil an sawiho ang.

India ramah chuan summit thu leh hla ai mahin ram hming chungchang avanga inhnialna leh sawi zuina thawmin hmun a luah tam zawk mek.