India leh Ukraine palaite chuan Prime Minister Narendra Modi-a leh Ukranian President Volodymyr Zelenskyy te chu Japan-a G7 Summit neih chhunga an inbiak theih dan tur an dap.

An inkawm thei a nih chuan Russian-ten nikum February thlaa Ukraine an rûn hnua hruaitu pahnihte inkawmna hmasa ber a ni ang.

Press Trust of India chuan Modi-a leh President Zelenskyy hi Inrinni khan an inbe thei mai thei niin a tar lang a; mahse, tihchianna a la awm lo.

“Lehlam lehlam hian rawtna awmte hi tihfel thuai tumin hma an la mek,” tiin thuneitu sang pakhat chuan news agency PTI a hrilh.

Ukrainian president hi G7 chairman nihna chelh mektu, Japan sawmna pawmin summit-ah hian a tel ve.

Ukraine First Deputy Foreign Minister Emine Dzhaparova chuan thla hmasa khan India a lo tlawh tawh a, ani hi Europe khawchhak lama indona a chhuah hnua an ram mi pawimawh zinga Delhi tlawh hmasa ber a ni.

Dzhaparova-i hian Minister of State for External Affairs Meenakshi Lekhi hnenah lehkha pawh a thehlut a. Lehkha hi Zelenskyy-a’n Modi hnena a thawn a ni.

Ukraine-a indona a chhuah hnuah Modi-a hian Russian President Vladimir Putin leh President Zelenskyy te hi vawi tam tak a be tawh.

Nikum October 4-a phone-a an inbiaknaah President Zelenskyy hnenah hian ‘sipai chakna hmanga hmalakna chuan eng inremna mah a thlen lo’ tih sawiin muanna a awm theih nan India chuan tha a thawh peih reng tih a hrilh bawk.