Congress hruaitu, Rahul Gandhi chuan Inrinni khan Delhi lailia sorkar ina a chenna hmuh chu a chhuahsan ta.

Thla hmasaa mi tihhmingchhiat thubuaia thiam loh changa hrem a nih hnuah Lok Sabha member a nihna hlihsak a ni a, BJP MP CR Patil-a kaihhruai Lok Sabha Housing Committee chuan 12 Tughlaq Lane bungalow, kum 2005 atanga a lo luah tawh chu April 22 hmaa chhuahsan turin a hriattir zui nghal bawk.

MP atanga hnawl a nih tak avang hian sorkar hmun reng reng a luah thei ta lo va, a nihna hlihsak a nih atanga thla khat chhungin a chhuahsan a ngai.

Gandhi-a hi Gujarat court chuan mi tihhmingchhiat thubuaia kum hnih tang tura a hrem hnuah ni 30 chhung bail-a chhuahin hei hi a appeal theihna hun remchang atana a tih a ni a. Mahse, appeal a thehluhah Zirtawpni khan hnehna chang zo lovin MP atan pawh dah let leh theih a ni rih dawn ta lo.

Wayanad MP hlui ni ta hian Gujarat High Court-ah emaw, Supreme Court-ah emaw Surat court-in a hremna pek chu khin that leha Lok Sabha member nih leh a tum nia sawi a ni.

A thubuai hi an party chuan BJP-in politics-a phuba an lakna niin an puh a, saffron party erawh chuan an pha.