pratigya yatra

Pratigya Yatra an tih hi Congress party-in nakuma Uttar Pradesh state assembly inthlan lo awm tura an campaign-na chi khat niin October 23 atanga November 1 thleng awh tur a ni.

Yatra chhung hian he state-a km 12,000-a thui tuam hman tum niin thuthar lakhawmtute kawm te, ‘nukkad sabha’ te, temple tlawh te, kawng zawh te, Jan Sabha leh thil dang dang hmangin vantlang inkhawm an huaihawt ang.

Pratigya Yatra hi thawh thuma neih turin an ruahman a. Bundelkhand-a Barabanki atanga tan hi Lucknow, Unnao, Fatehpur, Chitrakoot, Banda, Hamirpur leh Jalaun kaltlangin Jhansi-a tawp tur a ni.

Uttar Pradesh khawthlang lamah Saharanpur atanga tanin Muzaffarnagar, Bijnor, Moradabad, Rampur, Bareilly, Badaun, Aligarh, Hathras, Agra, Mathura an tuam ang.
    
Awadh atanga yatra tan tur chu Varanasi-ah bul tanin Chandauli, Sonbhadra, Mirzapur, Prayagraj, Pratapgarh leh Amethi kaltlangin Rae Bareli-ah a tawp an khar dawn thung a ni.

Congress General Secretary Priyanka Gandhi Vadra chuan Inrinni khan Uttar Pradesh-a Barabanki-ah ‘Pratigya Yatra’ a tan a,  an party-in Uttar Pradesh assembly inthlan lo awm turah an minifesto pasarih a puang.

Nakum inthlan turah hian Congress chuan candidate zinga 40% chu hmeichhe tan an dah dawn tih a sawi nawn leh bakah sikul naupang hmeichhiate tan a thlawna e-Scooty leh mobile phone sem te, lo neitute loan lak ngaihdam, mi retheite pawisaa tanpui leh electricity bill tihhniamte a tel.

“Kan manifesto neih tur zingah hian hmeichhe sikul naupangte hnena a thlawna e-Scooty leh mobile phone pek te, lo neitute loan lak ngaihdam te, mi rethei chhungkuate kum tin Rs. 25,000-a tanpui te, chhung tin electricity bill a zahvea tihhniam leh Covid-19 len hun laia bill zawng zawng ngaihdamte pawh a tel,” tiin a sawi tih news agency ANI chuan a tar lang.

Gandhi Vadra-i hian an party an sorkar a nih chuan sorkar hna nuai 20 siam an tiam a, lo neituten buhfai leh wheat an thar quintal khat zela Rs. 2,500 aia tlawm lo leh fu Rs. 400 aia hniam lova leite pawh a tel tih a sawi.

Congress hruaitu hian Barabanki-a lovah hmeichhe feh mekte pawh tlawhin a kawm a. “An hnathawh dan dinhmun hriatsak ka duh a, an fanute an  enkawl dan leh lehkha an zirtir thei em tihte ka hre duh a ni,” a ti.