Aizawl: Aizawl khawpui chhungah tui connection nei mi 66,293 an awm mek a, hetihlai hian tui lakna tur hnathawh mek, Greater Aizawl Water Supply Scheme (GAWSS) phase III chu kumin fur chhungin enchhinna (trial run) neih tum a ni. 

Aizawl Watsan Circle-a Superintendent Engineer (SE) Er. H. Duhkima hnen atanga ZALEN thudawn danin, nikum lamah thal a rei vangin Tlawngah tui a tlem a, kuminah erawh ruahtui a tlak hma deuh vangin nikum lam ai chuan tui a tam. Nikum tun ang hun chhoa Tlawnga tui awm zat chu million liters per day (mld) 31.461 a nih laiin, tuna awm zat chu mld 98.118 a tling.

Tun dinhmunah Tlawnglui tui pump-naah harsatna hranpa a awm lo a, hetihrual hian hmun thenkhata tui dahkhawlna tuizem lian tawk lo te, tui semdarhna pipe chak tawk tawh lo leh power supply khaihlak chang awm thin te chu tlema tui sem timuang hret thintu a ni.

Tun dinhmun GAWSS phase I leh II atangin chawhrualin ni tin tui mld 27-30 pump mek a ni a, GAWSS phase III pawh kumin fur chhungin enchhinna (trial run) neih tum niin, hawn theih hun tur erawh sawi theih a la ni lo.

SE Er. H. Duhkima chuan kan tui lakna ber Tlawng leh a chhehvel chu humhim a tul tawh takzet tih sawiin, “Tlawng malsawmna dawng khuate chuan Tlawng leh a chhehvel hi kan duat hle tur a ni,” a ti a. Tlawng leh a chhehvel humhalh duhna thangtharten an nei mek nia lang chu thil lawmawm tak a nih thu leh Tlawng malsawmna dawng khua zawng zawngah, Tlawng leh a chhehvel humhalhtu tur committee ‘Save Tlawng’ din vek theih nise, chu chuan nasa takin kawngro a sut a rin thu ZALEN a hrilh.