Aizawl: Directorate of Geology & Mining chuan sawrkar kum kalta 2022-23 chhung khan chhiah chi hrang hrang Rs.12,23,97,489/- chu sawrkarah an chhunglut.

Directorate of Geology & Mining (DGM) in sum an chhunluh te hi minor minerals (lung, balu) atangin Rs. 10,89,67,804/-, Petroleum Exploration Licence (PEL) fee atangin Rs. 1,30,55,485/- leh Laboratory Testing Fee atanga an hmuh Rs. 3,74,200/- te an ni tih Zirtawpni kaltaa State Geological Programming Board (SGPB) Meeting vawi 28-na GAD Conference Hall-a neih ah tarlan a ni.

He meeting Commerce & Industries Secretary R. Lalramnghaka kaihhruai ah hian hmalak tawhna leh hmachhawp chi hrang hrang te sawiho a ni a. Dan thar pahnih - The Mizoram Minor Minerals (Concession & Prevention of Illegal Mining), Rules 2023 leh The District Mineral Foundation Rules of Mizoram, 2023 chu ni 27.1.2023 a Cabinet Meeting in a pawm tawh tih tarlan a niin remchang hmasa berah Mizoram Legislative Assemby ah putluh a ni dawn a ni.