July 11; 2022; Art & Culture department chuan, Mizo ta a ni tih chhinchhiahna, Geographical Indication (GI) tag/registration nei, Mizo puan 5, Puanchei, Hmaram, Ngotekherh, Pawndum leh Tawlhlohpuan te chu, tah dan dik (technical specification) leh an zahawmna vawnhim bakah, hman dan leh khuahkhirhna dan te a siam fel tawh.

GI taq nei Mizo hnam puan 5 te vawnhimna tur dan hi Art & Culture secretary chuan June ni 10, 2022 khan 'notification' a chhuah a, chuta tarlan a nih dan chuan, Puanchei, Pawndum, Ngotekherh, Tawlhlohpuan leh Hmaram te chu a puan ngau ngau chuan a hmanna dik tak atan bak thil dangah hman phal a ni lo.
    
Zethlan te erawh thildangah hman khap a ni lova, amaherawh chu, a zahawmna ti bawrhbang thei khawpa hman phal a ni lo. Print chi hrang hrang hmanga siam phal a ni lo bawk.  GI tag nei puan design te chu, thawmhnaw dangah zeh tel anih pawhin a zahawmna ti bo thei zawng a hman loh tur a ni.

GI taq nei Mizo hnam puan 5 te vawnhim bakah hman dan leh khuahkhirh dan siam chungchang tarlanna ah chuan, chung puan hrang hrang 5 te dinhmun chipchiar taka tarlan niin, tah dan tur leh zeh dan tur tlangpuite, an rawngte, hruihdan te, ze hrang hrang an neihte bakah, tah dan dik tak (technical specification) te tarlan a ni a, chung zia leh nihna an neihte chu vawnhim tur a ni.

Mizo Puan 5 te-ah GI registration neih a nih theihnan Art & Culture department hnuaia Tribal Research Institute chu buaipui turin ruat an ni a, Art & Culture department, Government of Mizoram hminga G.I Registration hi tih theih a nih loh avangin Mizoram Art & Cultural Society hmingin dilna thehluh a ni.

November 20, 2017 ah Department for promotion of Industry and Internal Trade (DPIIT), Geographical Indication registry-ah theh luh a ni a. He dilna hi Geographical Indications’ Journal-ah April ni 12, 2019 atangin thla 4 chhung tarlan a ni zui a. Hemi chhung hian engmah sawiselna leh hnialna a awm loh avangin GI (a neitu nihna) chu Mizoram Art & Cultural Society pek a ni ta a ni.

Mizo puan 2 – Mizo Puanchei leh Tawlhlohpuan te hi August 16, 2019-ah register a ni a. A dang 3 – Ngotekherh, Pawndum leh Hmaram te hi Augst 22, 2019-ah register a ni bawk.

• PUANCHEI:
  Hman phalna te :
  Kut ni vangthla
  Inneihna leh Hlimni te
  Pipu Zai leh Lam
  Thil danga a zethlan te hman anih pawhin a zethlan size erawh technical
  specification ang zawm tur a ni ang
• Hman phallohna :
  Ruang khuh nan
  Dawhkan/Khum khuhna leh parda atan
  Stage, Lectern leh Bang chei nan
  Puanchei hi a puan ang ngau ngau chuan a chunga mite tan hian hman phal
  a ni lova, amaherawhchu a zethlan hrang hrang te erawh hman khap a ni
  lem lo.
• PAWNDUM :
  Hman phalna te :
  Kut ni vangthla
  Chhiatni leh lungngaihni ah
  Ruang khuh nan
  Pipu te Zai leh Lam
  Thildanga a design hman anih pawhin a zia te hi technical
  specification ang zawm tur a ni.
• Hman phallohna :
  Khualtha thilpek atan
  Pawndum hi hlim leh lawm ni ah leklam tur a ni lo
  Dawhkan/Khum khuhna leh parda atan
  Stage, Lectern leh Bang chei nan
  Pawndum hi a puan ang ngau ngau chuan a chunga mite tan hian hman phal a ni lova, amaherawhchu a design te erawh hman khap a ni lem lo.
• TAWLHLOHPUAN :
  Hman phalna te :
  Kut ni vangthla
  Mi huaisen leh hlawhtlingte chawimawi nan
  Thil tha lamah
  Pipu te Zai leh Lam
  In fuih leh in cho phur nan
  Thildanga a design hman anih pawhin a zia te hi technical
  specification ang zawm tur a ni.
• Hman phallohna :
  Ruang khuh nan
  Chawimawi phu tak te nilo hnenah chuan hlan loh tur
  Dawhkan/Khum khuhna leh parda atan
  Stage, Lectern leh Bang chei nan
  Tawlhlohpuan hi a puan ang ngau ngau chuan a chunga mite tan hian hman
  phal a ni lova, amaherawhchu a design te erawh hman khap a ni lem lo.
• NGOTEKHERH :
  Hman phalna te :
  Kut ni vangthla
  Thil tha lamah leh hlim ni ah
  Pipu te Zai leh Lam
  Thildanga a design hman anih pawhin a zia leh hruih te hi technical
  specification ang zawm tur a ni.
• Hman phallohna :
  Ruang khuh nan
  Dawhkan/Khum khuhna leh parda atan
  Stage, Lectern leh Bang chei nan
  Ngotekherh hi a puan ang ngau ngau chuan a chunga mite tan hian hman
  phal a ni lova, amaherawhchu a design te erawh hman khap a ni lem lo.
• HMARAM :
  Hman phalna te :
  Kut ni vangthla
  Thil tha lamah
  Pipu te Zai leh Lam
  Puan silh atana tah anih pawhin a zethlan Disul/Lenbuangthuam
  /Kawkpuizikzial te hman tur a ni ang. A zethlan pianzia erawh technical
  specification and zawm tur a ni ang.
• Hman phallohna :
  Ruang khuh nan
  Dawhkan/Khum khuhna leh parda atan
  Stage, Lectern leh Bang chei nan
  Hmaram hi a puan ang ngau ngau chuan a chunga mite tan hian hman
  phal a ni lova, amaherawhchu a zethlante erawh hman khap a ni lem lo.