Vawiin khan Zote Honda Mizoram Premier League Season 9 ni hnihnaah FC Venghnuai leh FC Bethlehem te inhmachhawnin goal 3 ve ve thunin an inhnehtawk.

Tun hnaia team langsar thar FC Venghnuai aiin Bethlehem lamin bul an tan tha a, minute lina lekah Lalbiakdika hmangin goal khatna an khung a, mahse Venghnuai lam an chhaih kawlh lek emaw tih turin Bethlehem lam an nawr let a. Minute 30-naah Sena'n Venghnuai tan goal a thun teuh hle a, bar a pet per. Vanlalthanga'n minute 41-naah an siphurh sutna goal mawi tak, free kick atangin a thun a, First-half hma 45+2-ah Lalrempuia hmangin an goal hnihna an thun leh bawk. 

Inkhelh chawlhlawk zawhah pawh Venghnuai lam bawkin an nawr zui a, minute 55-naah penalty an hlawhchhuak a, Lalrammuanpuia rawn pen chhuakin an goal thumna a rawn thun a, 3-1 in Venghnuai lamin hma an hruai ta. Mahse, Bethlehem lamin tlawm mai an tum hauh lo. Theih tawpa bei letin minute 71-naah Venghnuai goalkeeper Ramchhana chuan Ruatpuia hmaiah ben perin an goal-ah a lum lut a, 3-2 a ni. Minute hnih hnu lekah Bethlehem lamin Moses Lalrinzuala hmangin an siphurh an sut zo a, 3-3 in an inhnehtawk ta a ni.