Zaimi an tam, zai-thiam fe fe pawh kan ngah. He’ng kan zaithiam tam tak zingah hian zirna hlamchhiah tak tak pawh an kat ve nawk tho a. Zir zo inti pawh an awm tho. Chutiang zawng zawng karah kumina MIZO IDOL atana thlan chhuah tak, Mizo hmeichhia zinga Mizo Idol lallukhum khum hmasa ber GRACE LALCHHANHIMI chuan lehkha zir a ngai pawimawh hle a. Mizo Idol lo ni lo tehreng pawh ni se, zirna chhunzawm a tum thu a sawi. Kolasib nula zaithiam, Mizo Idol hnuhnung ber Grace Lalchhanhimi hnenah, Mizo Idol ni lo ta la...?” tiin zawhna kan zawt a, ti hian min chhang, “Ka tum dan chuan lehkha zir chhunzawm ka tum a,” tiin. Heti teh hmuk hian min chhang lem lo! A sawi zawm zel a, “Zai mite khawvelah hun ka hmang ve zeuh zeuh tawh a, zai hi nuam ka tiin, Mizo Idol pawh ni lo mah ila, music video siam pawh ka tum tho,” tiin rimawi khawvel nena an inchiahpiah dan a sawi ve nuah nuah a. Tawngkam chuti lutuka thiam em em a ni lem lo nain, a sawi tumah a chiang a, tawng lehsak ngai zauh zauh mah se, a khak sual duh lem lo. Mizo Idol neih a nih hma khan, Pathian hla sain music video siam a lo tum rilruk hman deuh a; mahse, Idol intihsiakna chuan a rawn nangching ta si a. Kan hmu hman lo hlauh. Grace-i chuan, “Lehkha zirna hi ka ngai pawimawh a. Lehkha zir reng chungin, thlahthlam chuang hauh lovin Zo rimawi khawvelah hun hman ka tum hrim hrim a, a pahniha tihkawp theih kha a tha in ka hria,” tia sawiin, zai ringawt hian a hlawtlin theih a inrin loh thu sawi lang bawkin Grace-i chuan, “Zaimi nih ringawt hi chuan, tun dinhmunah chuan hlawhtlin a harsat ka ring. Chuvangin lehkha zir hi ka ngai pawimawh,” a ti. Gov’t. Kolasib College atangin BA a zir chhuak tawh a, ‘English’ ah honours a ni nghe nghe a. MA pawh zawm leh a tum a; mahse, tunah erawh zirna lam a la chawlhsanin rimawi khawvelah bul rawn tan chhoh a tum mek a ni. Grace-i music video thar hi kan hmu thei tep ang. Tun music video siam tumin hma lak a tum chho mek a. Thla tharah hi chuan kan hmuh hman ngei a beiseiawm hle. Tun thla tawp atangin music video pahnih chu buaipui a tum niin Grace-a chuan a sawi a, “Kan buaipui hman tep tawh a. Thla tharah chuan kan ti chhuak hman mahna,” a ti. A music video thar turte hi Mizo Idol intihsiakna neih laia mi te kha a siam phawt dawn ni awm tak a ni. Hla thar pawh a nei nual tawh a, mahse, hna hmasaah miin an lo hriat ve tawhna hla te hmangin music video pahnih a siam ang. Chumi hnuah hla thar laman zuan a tum thu a sawi bawk a ni.