Rimawi khawvela award ngaihhlut ber tih ngam chu Grammy Award hi a ni - award chi hrang hrang sem thin ni mah se hei zet hi chuan zai mite ngaihhlut a hlawh bik a tih loh theih loh. Film lamah Oscars an ngaihlu ang bawk hian music lamah pawh Grammy an dah chungnung -  hetiang khawpa award hlu hi naktuk zing hian sem a ni dawn ta e. 

Grammy Award vawi 65 na hi Crypto.com Arena, Los Angeles-ah sem a ni dawn a, India ramah chuan Thawhtanni tuk zing dar 5:30 atangin en theih a ni ang. Award hian October 1, 2021 atanga September 30, 2022 inkarte a huam dawn a, nomination hi November 15, 2022 khan puan a lo ni tawh a ni. South African comedian Trevor Noah chuan a vawi thum nan award ceremony hi a host leh dawn a, ani hian a vawi 63-na leh vawi 64-nate kha a lo host tawh a ni. 

Nomination hmu hnem ber Beyoncé
Nomination-ah hian mimala langsar ber chu Beyoncé a ni a, award sem hun tak takah a langsar zo ang em tih chu a hriat theih thuai dawn e. American singer hi category pakua zetah award dawng thei tura chhawpchhuah a ni a, nomination hmu hnem ber a ni. 

Grammy Award-ah hian Beyoncé hian record a nei tha hle a, nomination a hmuh tawh zawng zawng belhkhawm chu 88 zet a tling tawh. Beyoncé hian a pasal Jay-Z record (88) a nih rual chiah bawk a, record an nei ropui dun hle.

Kum 41 mi Beyoncé hi Kendrick Lamar chuan a dawt a, category pasaih-ah a lang. Kendrick Lamar hi award dawng tura rinkai zingah a tel phak a, a langsar zui a nih pawhin a mak lo ang. Hetih lai hian Adele leh Brandi Carlile te pawh an langsar viau a, category pasarih-ah ve ve an lang. 

Taylor Swift
Tum dang ang bawkin Taylor Swift chu mipui mit fukna tur a ni leh dawn a, nomination pali chauh a hmu tih erawh hriat tel a tha. American singer hian Grammy Award hi 11 zet a lo dawng tawh a, kuminah erawh beisei angin nomination a hmu tam tawk lo. 

Chutih rual chuan award ngaihhlut ber ber - Song of the Year, Best Song Written for Visual Media, Best Country Song leh Best Music Video la thei dinhmunah a ding a, award a hum haw leh lo ang tih sawi theih a ni lo. 
Tute nge perform dawn? 

Grammy Award-ah hian khawvel huapa zaithiam lar ber berte an inlan dawn a, perform tur zinga hming langsar ber chu Harry Styles a ni. Harry Styles bakah hian - Bad Bunny, Mary J. Blige, Brandi Carlile, Luke Combs, Steve Lacy, Lizzo, Kim Petras leh Sam Smith te an perform dawn bawk a, midang inlan tur an awm nual bawk. Cardi B, Viola Davis leh Olivia Rodrigo te pawh award ceremony-ah hian an inlan ngei a rinawm. 

Kuminah hian category thar - songwriter of the year (non-classical), Best Alternative Music Performance, Best Americana Performance, best score soundtrack for video games & other interactive media leh best spoken word poetry album te a awm thar dawn a, award dawng hmasa ber record siamtu nih a chakawm khawp ang le. 

Award show hi US-ah chuan CBS ten live-in an pechhuak dawn a, live.grammy.com leh Paramount+ lamah live-in a en theih bawk ang.