August 31, 2022; Council of Minister thukhawmin grape wine siam phalna tur dan (rules) a pawm chu, Champhai leh Hnahlan grape chingtute chuan lawmawm an tih thu an sawi a, hetihlai hian nimin a 'rules' pawm tak chu 'Notify' tur a la nih avangin rules thar hnuai a inkaihhruaina tur kimchang erawh hriat theih a la ni lo.

Hnahlan Grape Growers’ and Processing Cooperative Society hruaitute chuan Council of Minister in grape wine siam phalna tur dan a pawm ta chu lawmawm an tih thu ZALEN an hrilh a, inkaihhruaina siam dan tur kimchang hriat la ni lo mah se thawk khat erawh a veng niin an sawi. 

Hnahlan Grape Growers’ and Processing Cooperative Society hruaitute sawi danin, kumin ah grape rah kg ah Rs. 60 in, quintal 1,500 chuang hret an lei a, tun dinhmunah wine a siam tur grape tui sawrsa litre nuai 1 chuang winery ah an nei mek.

Champhai Grape Grower's Society hruaitute pawhin Council of Minister thutlukna chu lawmawm an tih thu ZALEN an hrilh a, tun Assembly session lo awm tur zawh hnu, remchang hmasa berah Excise minister Dr. K. Beichhua sawmin, Sial nen a lawmna ropui taka buatsaih an tum tih an sawi.

Champhai lam hian kuminah grape rah kg ah Rs. 60 in, quintal 1,100 bawr vel an lei a, winery ah grape tui sawrsa lirtre nuai 3 chuang an nei mek. Tun September ni 6, 2022 hian Baptist Church of Mizoram (BCM) nen ruahmanna an lo siam tawh angin, sacramental wine chungchangah inremna an ziak thar leh dawn tih Champhai Grape Grower's Society hruaitute chuan ZALEN an hrilh bawk.

MLP Rules hnuaiah, Mizorama grape hmanga wine siam leh zawrh phal a nih tak avangin, Champhai leh Hnahlan winery ah dan hnuaiah grape wine siam leh zawrh theih a ni leh dawn a, hetihlai hian Excise & Narcotics department hotute chuan, rules thar chu la 'Notiyy' tur a la nih vangin tun ah chuan rules hnuaia inkaihhruaina tur kimchang hriat theih a la ni lo tih ZALEN an hrilh.