July 13, 2022; Champhai leh Hnahlan a grape chingtute'n, eptu party hrang hrangte hnen atangin, dan hnuaia wine an siamchhuah an dodal loh thu tarlanna, 'No Objection Certificate' (NOC) an dawng kim tawh a, excise minister hnenah thlenin, sawrkar thu an ngaichang mek.

Champhai Grape Growers' Society hruaitute hnen atanga ZALEN thudawn danin, Congress, ZPM, Mizoram BJP leh PC party ten NOC an pek te leh anmahni lamin ngenna an siamte chu excise minister hnenah an thehlut tawh a, chu chu tuna an ngaihchan lai mek niin, cabinet in wine rules a pass sak mai an beisei mek a ni.

Champhai leh Hnahlan a kuthnathawktute tharchhuah grape chu lawh hun a ni chho tan mek a, Hnahlan lam chuan tun June ni 20 atang hian winery a sawngbawl tur grape an lei tan tawh dawn a, hetihlai hian Champhai lam erawh chuan an lei tan theih hun tur an la sawi thei mai lo. Hnahlan lam hian kg 1 Rs. 60 leh Champhai lamin Rs. 50 in an lei dawn nia thudawn a ni.

Tarlan tawh angin, Champhai Winery bikah,  grape tui sawrsa, tanky a dahkhawl a tam sa hle a, tanky 30 awmah tanky 5 emaw vel chauh ruak a awm.

Hetihlai hian All Mizoram Farmers' Union (AMFU), Champhai hqrs. chuan vawiin tlai khan Champhai Grape Growers' Society te chu 'thla hualna' an neihsak nia thudawn a ni.

'Mizoram Liquor Prohibition Act 2019' hnuaiah zu hrim hrim khap bur a nih avang leh, kumin March ni 25-a Council of Ministers thukhawmin Mizoram Liquor (Prohibition) Rules, 2022 a pawm takah, wine chungchang hi telh a nih loh avangin, dan dinglaiah chuan grape wine siam hi khap a ni.