Aizawl: Mizoram sawrkarin dan hnuaiah grapewine zawrh a remtih tak avangin zawrh diltu (vendor license)-te dilna chu enfiah mek a ni.

ZALEN-in Excise & Narcotics Department thawktute hnen atanga thu a dawn danin grapewine zawrh diltu hi an thahnem hle a. Phalna hi Aizawl leh district khawpui dangah pek theih a nih avangin tunah hian enfiah hna thawh mek a ni tih an sawi.

Dan hnuaiah grape tui hi zawrh tur ni mah se sakhaw puipunna hmun hnai leh zirna in bul hnaiah zawrh phal a nih loh avangin tuna diltu tam tak hi chuan an zawrh theih a rinawm loh niin an sawi.

Excise & Narcotics department thawktute chuan vendor license chu tihfel ran an tum nia sawiin zuar thei tur zat bithliah erawh a awm lem lo niin an sawi a. Vendor license diltu hi Aizawlah ringawt pawh mi 200 chuang an awm niin an sawi bawk.