August 24, 2023; Joint Group YMA Langkaih leh Taitesena group YMA ten, Mamit Truck Owner's Association leh Mamit Tipper Association te chu road block an neih mek hlip thuai turin an ngen.

Thuchhuah an siamah Group YMA pahnihte chuan, Mamit Truck Owner's Association & Mamit Truck & Tipper Association ten an District chhung kawngte siamthat duha hma an la chunlawmawm an ti a. Chutih rualin, an hmalakna a NH 44-A an block erawh chu mipuite tana harsatna thlentu a nih avangin an thlawp lo tih an tarlang. "Hun rei tak Khawthlang lam leh Aizawl lam lirthei veivak tur min dang reng pawh hi titawp thuai turin kan duh tak zet a ni," an ti.

Kawng tha zawk kan neih theihna tur hian Group YMA ten hma an lo la tawh thin tih tarlang bawkin, "Tunah pawh hmalak mek zel a nih laia mipui tana harsatna siam zawnga Mamit Truck Owner's Association leh Mamit Tipper Association ten hma an la hi hriatthiam harsa kan ti a, tuna Road block hi hlip thuai turin kan ngen a ni," an ti bawk.

PWD Highway lam thu neitute pawh tuna an buaina, Darlak leh Tuidam inkar (National Highway 44-A) kawng tha lo leh Motor kal harsatna lai te hi a rang thei ang ber a siam tha vat turin an beisei bawk.