November 1, 2022; Hachhek Bial Kuhva Chingtu Pawl (HBKCP), Hachhek bial chhunga village council te leh pawl hrang hrang ten an kuhva tharte hralh a nih theih nana hmala tura sawrkar karna atan vawiin atangin an bial chhunga sawrkar hnathawk pisa kai turte an dang.

HBKCP hruaitute hnen atanga ZALEN thudawn danin, tukin atanga sawrkar hnathawk pisa kai turte an danah boruak duhawmlo thleng khawi hmunah mah a awm lo a, hetihlai hian zirna in te erawh a pangngai angin an kal a, health department lam leh P&E lam pawh dan an ni lo.

HBKCP leh pawl hrang hrang hruaitute bakah VC te nimina kawrthah North YMA Runa thukhawm chuan, sawrkar karna atan November ni 1-4, 2022 chhung an bial chhunga sawrkar hnathawk pisa kai turte dan an rel a ni.

HBKCP leh Hachhak biala pawl hrang hrangte October ni 27, 2022 a thukhawm chuan, Hachhek biala kuhva tharte hralh chungchanga an harsatna tun thlenga sutkian a la nih loh avangin October ni 31, 2022 thleng sawrkar hmalakna ngaihchan an lo rel tawh a, sawrkar hmalakna a awm loh chuan lungawi lohna lantir nan November ni 1, 2022 atangin tiam chin awm loa total bandh kalpui an lo rel tawh bawk.

Nizan October ni 31 zanlai thlengin sawrkar atanga thu lawmawm an hmuh loh avangin vawiin atanga November ni 4 thleng sawrkar hnathawk pisa kai tur dan a, awmzia a neih loh chuan sawrkar hnathawk pisa kai turte dang chungin, November ni 5-8, 2022 chhung an bial chhunga kawngpui zawng zawng an dang ang. Chu chuan awmzia a la nei lo zel a nih chuan November ni 9, 2022 atangin total bandh kalpui an tum bawk.