April 28, 2022; Champhai Zotlang a awm, 'delete kohhran' tia mi thenkhatin hming an vuah te chuan nimin lam khan 'halral thil hlan' atan patling kum 55 mi hlan an tum tih thuthang a awm a, police, YMA leh VC te a hmunah kal nghalin, he thil hi dawt thuthang nge thu tak a nih hriat theih erawh a ni lo.

ZALEN thudawn danin, deleted kohhran tia hriatte hi chhungkaw 6 emaw vel niin, naupangte nen mi 40 bawr vel an ni a, mi thil pek te, thilpek dawnte an duh lo a, khua leh tui nihna document pawimawh engmah neih an nei lo a, chumi vanga delete kohhran tih vuahsak an ni. An fate sikul an kal tir lo a, khawthlang inenkawlna hrim hrim an duh lo a, chhiatni fund an pe ngai lo bawk. A hranpa in biakin an nei lo a, mimal in ah an inkhawm thin.

Nimin lam khan vengchhung titi ah, an inkhawmna thin in neitu pa ber chu halral thil hlanah an hlan dawn tih thuthang a awm a, YMA leh VC te an meeting nghal a, khawtlang hruaitu lam chuan an tih tak tak an ring lo a, an meeting mek laiin, tuten emaw Champhai police lam an lo hrilh a, police an lo thlen tak vangin mipui an pungkhawm nghal bawk a, YMA leh VC lam pawh delete kohhran tia hriatte inkhawmna hmunah hian an thleng nghal bawk a ni.

Police leh khawtlang hruaitu lamin thil an zawhfiahna ah an kohhran mite chu an pha thung a, an eizawnna hmanrua, silai te leh thil dang pawh an tihral nachhan chu thisen chhuah an duh loh vang a nih thu an sawi a, chutiang a nih lai a, halral thil hlan a tu emaw hlan chu an nihphung nen a inmillo niin an sawi thung.

ZALEN thudawn danin, nimin lam khan an inkhawmna thin mimal in a room thianghlim an tih a ni engemawti chhung tuma tlawh pawh loh a inkhung tawh, inserh hrang nia ngaih, in neitu pa ber kum 55 mi vel chu bawlhfai a ni a, chu chu halral thil hlan ah zan lamah hlan a ni dawn tiin thuthang a awm zui nghal a, thu dik nge thuthang dik lo tih erawh an zinga tel ve lo tan chuan engmah hriatfiah theih a ni tawh lo a ni.

An pawl/kohhran din tu ber chu Pi Ngurbeli a ni tih thudawnna chuan sawiin, a boral tawh a, Myanmar lam atanga rawn chhuk nia hriat a ni. Tunlaiin an rinna tawmpuitu Myanmar lam atangin mikhual an nei nual a, chung ang mite pawh chu hripui leng boruak nen anmahni khua a haw ve tawh turin khawtlang hruaitu lam chuan nizan lam khan an ngen nghal nia thudawn a ni bawk.