Aizawl: Haulawng khawtlang chuan an khaw chhunga hmun pakhat Hmuntlang veng chu bawlhhlawh paih lohna hmun ‘Free Litter Zone’ ah an puang.
Haulawng Clean and Beautification Committee hian an khua chu Mizorama khaw fai ber ni turin tan an la mek a, tunhnai khan an hmalakna hi Aizawl leh Lungleia chanchinbumi thenkhat ten an tlawh a. Haulawng VC te nen inkawmin an hmalak tawhna leh hmachhawp te an hrilhfiah a ni. Haulawng khua hi Lunglei DC kalta Dr. Ankita Chakravarty hmalaknain Oil India Ltd. chuan bawlhhlawh paihna motor an pe a, hemi hmang hian kar khatah tum hnih Thawhlehni leh Zirtawpni ah te bawlhhlawh an paih thin a.
VC te kaihhruaina hnuaiah NGO hrang hrang telna Haulawng Clean and Beautification Committee dinin, faina leh khawtlang cheimawina kawngah theihtawpin hma an la mek a. Khawlai dungah bawlhhlawh awm lo tur te, chhungtin in inthiarna tha tak neih vek te, mipui thinlungah naupang atanga puitling thleng pawhin fai leh thianghlimna an rilruah tuhngheta thanhnan tura hmalain, Section fai inelna an buatsaih thin a, chhungtin hnenah ngenna an siam thin bawk. An khawlai hmun remchang lai apiangah thingphunin khawlai hmun remchang ah Flower pot an dah a, fai inzirtirna thuziak an tar bawk.