Aizawl April 7, 2024 : Mizoram State Health Care Scheme hnuaiah health care bill ba Rs. Vbc. 60 te a awm thin laiin tun dinhmun a ba awm zat chu Rs. Vbc. hnih bawr vel chiah a ni tawh.

Mizoram Health Care Society thawktute hnen atanga ZALEN thudawn danin, tun dinhmuna health care bill ba awm mekte pawh tun hnai maia bill an tihfelte a ni tih an sawi a, tuna ba awmte pawh a rang lama tihfel zel theih an in beisei.

ZALEN-in record a neih danin kumin January thla thlenga health care bill ba awm zat chu Rs. Vbc. 57 bawr vel a tling a. Nikum December 11-a sawrkar thuchhuah hmanga mipuite an lo hriattir tawh angin Chief Minister Lalduhoma hova finance department thuneitute thukhawm chuan health care bill ba pek atan Rs. Vbc. 40 a dah hrang a, heng bakah hian a remchan dan angin bill ba peka tur hi ruahmanna chhoh a ni.

Hetihlai hian sawrkar kum liam ta, 2023-24 policy hnuaiah chhungkaw inziak lut 26,569 chauh an awm a. Health care-a inziak lut chhungkuate hi AAY (card eng)-ah chhungkaw 3,721, PHH (card pawl)-ah 12,229, Non NFSA (card var) 10,422 leh ration card nei lo 179, a vaiin, 26,569 an ni.

Chief Minister Lalduhoma chuan health care scheme hman lai chu an titawp dawn tih a lo sawi tawh a. “A aia tha zawkin kan thlak dawn a, tunah hian buatsaih mek a ni, kan health care scheme thar hnuaiah chuan cashless vekin kan ti dawn a, pawisa ken/pek a ngai tawh dawn lo,” a lo ti tawh bawk.