ZALEN November 3, 2024 : Mizoram State Health Care Scheme (MSHCS) chu thla ruk atan pawh sei leh a ni a, inziak lutten Rs. 1,00,000 thleng an bill thei dawn a. Hetianga inenkawlna man hmuh let theih zat a tlakhniam chhan hi policy term thla ruk chhung chauh a nih vang nia thudawn a ni.

Mizoram sawrkarin health care scheme a kalpuiah Rs. 2,00,000 thleng bill theih a ni thin a, chumi ang chuan health care scheme-a inziak lutten damdawi ina an inenkawlna man an bill thin.

Hetihlai hian Mizoram sawrkarin tun hnaia health care scheme thla ruk atana pawh sei tharah chuan Rs. 1,00,000 thleng chauh bill theih a ni dawn a, hemi chungchanga ZALEN thudawnna MSHCS hotute chuan policy term thla ruk chhung chauh a nih vangin bill theih zat a tlem ta niin an sawi.

Mizoram sawrkar chuan MSHCS hman mek chu nakum March 31 thlenga hman turin a pawt sei a, inziak lutte hian kumin October leh nakum March inkarah Rs. 1,00,000 thleng an bill thei ang.

Sawrkar thuchhuah tar lan danin mipuite harsatna sutkianna turin MSHCS chu thla ruk chhung atan pawh sei a ni a, hetah hian inziah luh theih a ni a, sawrkara MR bill thei, sawrkar hnathawkin MR a billsak theih leh sawrkar hnathawkte erawh inziah luh theih a ni lo.

MSHCS hnuaia inziak lut tur hian chhungkaw member bituk zat a awm lo va, ration card eng tan inziah luh man Rs. 100 niin, card pawl tan Rs. 500 a ni a, card var tan inziah luh man Rs. 1,000 niin, ration card nei lo tan pawh Rs. 1,000 a inziah luh theih tho a ni.

Sawrkar thuchhuah tar lan danin kumin November 30 thleng inziah luh theih a ni dawn a, October 1 chin hnu lama damdawi ina in-admit-te chuan health care hmanga an bill dawnin enrollment thar an hmang thei dawn a ni.

Hetianga MSHCS thla ruk atana pawh sei leh a nih chhan hi ZPM kaihhruai sawrkarin health care scheme a duan thar, Mizoram Universal Health Care Scheme (MUHCS) hman theih a la nih loh vang a ni.