Aizawl : Nimin khan Health Minister, Dr.R.Lalthangliana chuan khualzin mite luhkapui Lengpui a tlawh a, Covid-19 vei mi 50 enkawl theihna tur 'Government Middle School-1' a tlawh. 

Lengpuiah hian tunah Active Case 17 an nei mek a, Health Minister chuan, "Tun tum chu Covid hmasa ai khan Lengpui hi kan vanduai tlat mai a, Lengpui-a kan Community Health Centre bulah hian Covid dahna kan neih hi 8 chauh a ni a. Building hran mah ni se, Damdawiin kalte tan a tihbaiawm a. 4C hming thar kan vuah a, Task Force-te enkawl turin Covid vei dahna atan Government Middle School-1 remchang insiamsak thei hi lawmawm ka ti hle a ni. Nikum kha chuan Lockdown kan puanin Covid kan kiam deuh a, tunah hi chuan kan Lockdown vangin a 'chain' hi kan chhu chat mai rih lo," a ti.

Health Minister hian Lengpui Task Force-te hi PPE hmanraw hrang hrang, face mask, hand sanitiser leh sum fai thahnem tak a pe a, Bialtu MLA Er.H.Lalzirliana pawhin Task Force-te hi sum faiin a tanpui bawk.

Health Minister chuan Lengpui Airport pawh tlawh nghalin, "Lengpui Airport hi kan fimkhur tawh em em a, Thlawhnaa lo haw apiangte uluk takin Ragt Test kan nei zel a, an result negative mahse, ni 7 chhung kan khunghrang a. Chumi hnuah RT-PCR kan ti leh a, chuta negative chauhte chu kan inchhuah zalen a ni. Thawh hnihna hi a danglam a, thalai pawh a zuah lo a, kan fimkhur tlan hle a ngai a ni," a ti bawk.