Aizawl: Health Minister Dr. R. Lalthlangliana chuan Zirtawpni khan Kawlkulh PHC tlawhin damdawiina thawkte leh khawtlang hruaitute nen inkawmhona neiin dam-dawiin tihchangtlun zel dan tur bakah khawtlang hriselna atana hmalak dan turte an sawiho.

Minister chuan Kawlkulh PHC chipchiar taka fangin an mamawh leh harsatna tawhte a ngaihthla a, sawrkarin health department hnuaiah staff chi hrang hrang engemawzat a lak thuai dawn avangin thawktu indaih lohna damdawi in hrang hranga awm chu reilo teah chinfel a nih tur thu a sawi a, X-ray khawl pawh a dahna tur pindan a bika siam a ngaih avangin a khawl aiin a dahna hmun tha neih hmasak a tul a, ngaihtuahna sen mek a nih thu a sawi a, Ambulance leh mamawh dang an thlente pawh a tul anga enzui nghal vat tur a nih thu sawiin khawtlang hruaitute ngenna angin Kawlkulhah a rang thei ang bera free medical camp neih a nih tur thu a sawi bawk.

Bialtu MLA L. Thangmawia pawhin Kawlkulh PHC chu uluk taka enkawl anih thu sawiin thawktute inpekna a fak a, MLA fund atangin Generator tha tak a leisak tur thu a sawi a ni.

Kawlkulh damdawi in hi kum 1959 khan Subsidiary Health Centre atan din a ni a, kum 1980-ah doctor-in thutchilh tanin Primary Health Centre-a hlankai a ni. Kawlkulh PHC hnuaiah hian sub-centre pasarih - Kawlkulh SC, Dulte SC, Hliappui SC, Pawlrang SC, Chhawrtui SC, Saichal SC leh Vanchengpui SC te a awm a, PHC-ah hian khum 10 a awm a, Medical Officer hovin thawktu 14 an awm mek a ni.

Minister hian Kawlkulh PHC a tlawh hma hian Ngopa PHC a tlawh a, hetah pawh hian damdawiina thawkte nen inkawmhona tha tak neiin damdawiin tihchangtlun dan tur chi hrang hrang an sawiho a ni.